按照職場傳統文化，離職時會向上司及同事派「散水餅」，表達感謝之意，「好嚟好去」。不過有打工仔就分享「散水」的不快經歷，指自己因健康問題辭職，並準備了曲奇作「散水餅」，怎料一向唔妥佢的上司竟出言諷刺，甚至做出過分舉動！

有網民向社交媒體Facebook專頁「公務員Secrets」投稿，表示早前因健康問題決定「裸辭」，好好調理身體。樓主坦言，因辭職後將失去收入，「唔敢使咁多錢」，加上其任職部門的人數較多，所以最終選擇在離職當天派曲奇予上司及同事，作為「散水餅」。

本來一切相安無事，不過樓主就指其中一名「一向唔多鍾意我」的上司，在收到其「散水餅」後，便在座位上大聲表示：「果然係散水餅，又散散哋，又水水哋，仲要係餅，真係餅如其名！」樓主聞言感到不快，但考慮到日後不會再跟對方有來往，便「當聽唔到」算數，未有與對方計較。怎料更過分的原來在後頭，當樓主準備離開公司時，該名上司竟特地走到其附近「掉咗塊餅」，令樓主感到非常難受。

樓主批評該名上司毫不尊重，「你要掉咪等人走咗先掉，唔鍾意食咪直接講」，認為「散水餅」是代表示少少心意及感謝，即使不領情亦不應如此不尊重。樓主表示一直想「好來好去」，不解對方為何要「撕爛塊面皮」。

帖文引起網民熱烈討論，不少人都批評該名上司的行為過分，又安慰樓主不要太在意，「有好多人都唔識尊重人，無謂放喺心度！傷身！」、「你應該慶幸你終於離開唔使對住（呢）啲人」、「恭喜你離開咗呢個部門，最後人地離職嗰日都要咁冇禮貌，平時都唔方好工作環境」。

另外亦有網民認為樓主理應「把握」離職機會，狠狠與該名上司「死過」，「其實你都走啦，使咩同佢客氣，開佢波嘛，佢又無面，你又可以心情舒暢」、「換轉係我，我一定嘈爆佢，橫掂都last day了，怕咩呀！將咁耐以來嘅氣一次過全爆啦」、「畀著我，都last day，教返佢乜嘢叫尊重」。

資料來源：「公務員Secrets」FB