張兆輝喺呢行撈得咁掂，除咗戲好，形象都好重要！輝哥同老婆郭碧妍結婚24周年，育有一子一女，出名係「24孝父親」同埋「暖男老公」，從來冇出嚟「沙沙滾」！今年三月兩公婆結婚24周年紀念日，張兆輝上載短片，大晒夫婦恩愛合照，仲有老婆年輕時嘅靚女相，片中仲見到他送上鮮花，擺出心心手勢，還發表愛的宣言：「有一種人可以百看不厭，有一種感覺永如初見，我不知道假如不曾與你相遇，我會不會相信緣份，感恩有你陪我老去，是我這輩子最大的幸運，謝謝你給我丈夫的身份，24周年快樂我的張太太」甜蜜爆燈，真係好老公模範！



原來最近輝哥身在廣州拍戲，張太郭碧妍自然形影不離，照顧周到。日前工作後輝哥相約了老友關禮傑在酒店飯聚，豈料張太卻不慎趴咗落地，痛到喺地下坐足一分鐘先起到身，好彩只係「拗柴」，扭傷左腳足踝。不過，當時痛到有差啲斷腳嘅感覺，而輝哥比她更緊張，馬上替她敷冰消腫，張太留言：「雖然很痛、但我見到我的愛人比我更痛、我就不敢説話了！右腳剛好左腳又受傷，我的腳今年犯太歲了…」相中見到「愛妻號」輝哥雖然跟關禮傑飲嘢中，但不忘為老婆託腳，小心奕奕地用冰敷傷患，好man咁變身「暖男老公」，張太甜在心中。