本港近年爆發「移民潮」，不少港人都計畫移民到英美等地。近日有網民於討論區分享指，目前正計劃賣樓移民，惟平日甚少聯絡的叔叔得悉後，立即與他聯絡，更勸他將單位留給堂弟，稱可交2至3千元租金。待完成供樓後，再以8折轉售予堂弟，事件引網民熱論。

該男網民於「香港討論區」發文指，最近準備移民到外國，打算將自住的物業售出，正尋找合適的買家。惟其叔叔得悉後，立即與他聯絡。叔叔詢問樓主「有乜計劃，有乜打算」以探口風，其後更開門見山表示，「不如唔好賣樓，將供緊呢層樓留畀堂弟」。叔叔亦解釋，樓主的父母已買下公屋，不愁無居所，而且層樓仍要再供多十數年，不如將單位留給堂弟，更稱「最多交返$2000至$3000租，供完8折賣畀佢」。

樓主坦言，與叔叔一家關係甚疏遠，「平時一年都講唔夠十句嘢，除咗新年同清明之後都無乜機會見」，並透露叔叔於地盤工作，平日喜歡嫖賭，形容「由我有記憶開始，佢已經有幾多賭幾多」；堂弟則從小讀書不成，「中三之後返一日學就休兩日，考試全紅（不合格）」，畢業後宅在家中兩年才願意打散工，更稱自己有學識又嫌辛苦，不願到地盤工作。

樓主續指，叔叔曾勸道，「一世人兩兄弟，唔通益外人」，令他心感不滿，指「留層樓畀個妹好過畀個堂細佬」，「仲有『堂』細佬唔係『親』細佬呀，隔咗層就隔咗層」。最後樓主亦沒有答應叔叔要求，只「笑笑口」矇混過去。

帖文引起網民的熱論，有網民表示樓主的叔叔過於貪心，「搵自己人笨」、「阿叔大貪咗」，有人更直言「供完層樓都升值，仲要八折畀佢？」

資料來源：香港討論區