「宇宙天團」ERROR成員193（郭嘉駿，三爺）近期Hit爆，連隔離台吳業坤（坤哥）都搵佢一齊合唱Cover Song，但勢估唔到影帝古天樂（古仔）都俾佢冧掂埋！話說同公司的人氣男團MIRROR周二（11日）假九展Star Hall舉行《MIRROR “ONE & ALL” LIVE 2021》演唱會尾場，古仔都驚喜現身去「朝聖」，席間仲吸引大批「鏡粉（MIRROR粉絲專稱）」上前索合照，原來當日三爺亦有於後台同古仔影相，對方更Nice爆搭實佢個膊頭，三爺即得戚到擺出V手Pose，並於IG分享兼留言：「#知我咩料啦😎」一眾網民紛紛搞笑說：「古生搵3爺集郵」、「有料到喎3爺😍」、「搭晒膊頭咁喎」等，有人問：「33進軍電影界？！？」仲有網民大讚「兩個男神同框」！