前TVB藝人陳積榮今日不敵癌魔離世，終年38歲，其藝訓班同學兼好友孫慧雪在社交網貼上多張昔日舊照，以千字文懷念。孫慧雪表示與對方有很多經歷，一世都不會忘記，又大讚對方是一個直率、充滿正能量的人，在抗癌期間非常努力，不希望別人為其擔心，也怕自己令人失望，「其實你已經好叻好叻！好硬淨呀！撐咗咁耐，要好好休息吓啦！」
孫慧雪回憶當初陳積榮發病時，曾對她表示這是上天給其考驗，「只要過咗呢關，之後就可以繼續努力完成，好多好多你想要做嘅事，你話實在有太多人對你好，你好想還俾（畀）大家，好想用自己力量幫忙同鼓勵病友，喺你病同唔舒服嘅時候，你都係咁為人著想！你教我人生健康係最重要，無需要為唔值得嘅人，或唔值得嘅事而唔開心，你教我每一個演出都好應該要珍惜！就算只係行過嘅角色，你都會好珍惜！你話人生唔需要追求物質，足夠就好，你話細細個赤腳喺士多跑來跑去，過一啲簡單生活都已經好開心，你話人生好短，一定要追夢，要努力成就想做嘅事，等自己無悔！你話愛要說出口！我全部都記住啦！」孫慧雪最後表示很開心認識陳積榮，指大家只是短暫離別，期待來日再聚，並謂知道故友不希望大家因為他而不開心，所以她會努力忘記悲傷，重新振作。