天降橫財都未必是好事，有網民抱怨，接到陌生人經轉數快錯誤轉賬1萬元，對方還多次致電及發訊息要求歸還，網民不勝其擾，致電警方及親身去銀行查詢，最後由銀行之間辦理，不過網民直言對方老實不客氣，想「hea佢幾日先」。

網民在網上討論區「親子王國」發文，指清晨6時就收到陌生人來電，對方指輸入錯電話號碼入錯錢，網民透露「我即時扯火，講到我有好處咁，我即時『哦，咁我reject 個入錢』收佢線」，之後未到9時陌生人又打來，相隔2小時又打來，中間再有發訊息。

網民不忿，對方態度無誠意，「你入錯畀人, 咁大碼,係咪應該低聲下氣/好聲氣啲...係佢錯在先, 我要跟手尾, 講到我有著數咁，重要係咁炸我電話」，又批評「好bossy、好老馮，句sorry都無，似我求佢多啲，我條氣好唔順囉」

網民擔心是洗黑錢，所以還致電「防騙易18222」求助，「啊Sir話， 唔好再透過電話，叫我去分行辦」。網民直言「就算畀返佢，我要去銀行排餐飽...等返一頭半個鐘，先有人幫我跟，我得個吉...起碼hea佢幾日， 佢攪唔掂，我先主動聯絡銀行...我無理由請日假， 幫人跟手尾架」。

網民於是去了銀行一趟查詢， 「銀行叫我咩都唔洗做， 轉錢畀你個位， 自己去銀行。填表退錢！好在頭先銀行無人排， 好快問到。...佢求我一啲唔客氣，當我傻，『保障雙方』，一聽到扯火...我頭先兇佢， 你再打嚟我報案告你滋擾我， 先收手」。其後網民得悉陌生人已經聯絡對方所用銀行，經銀行之間辦理退款手續。