岑麗香、龔慈恩及商天娥等為TVB新劇《寶寶大過天》宣傳，席間宣布首集7天跨平台收視有26.6點。香香上月中宣布細仔Julius（小腰果）出世，時隔個多月，香香經已火速收身，身穿碎花連身裙嘅香香身材Fit爆，身形曲線出返晒嚟。她說因為要出來做劇集宣傳感到有少少壓力，而壓力變成了動力，加上穿收身内衣幫手，現時距離理想目標體重還有5至10磅，但不會給自己太大壓力，最緊要健康及開心。

她自爆播出第一集《寶寶大過天》時與大仔一齊睇，豈料吸收能力好高嘅兒子，竟然學劇中小朋友打她，雖然事後她有指引，但兒子不明白，還會妒忌她抱另一個小朋友，所以待兒子長大一點才敢給他看。她表示，去年初拍攝時她的大仔Jacob不識反叛，但現時兩歲就唔同晒，𠵱家湊大仔會有少少壓力，所以每日會提醒自己練習耐性。

劇中她與商天娥有婆媳問題，幸好現實生活剛剛相反，奶奶幫她很多，仲大賣口乖讚今時今日老公強強咁生性，都係由奶奶教出嚟，所以信任夫家教小朋友的方法。不過因疫情關係，身在加拿大的老爺奶奶，與孫仔只可以透過視像見面。另外，劇中她被奶奶激到尖叫，觀眾批評反應太浮誇。她解釋原先劇本寫咗更多反白眼及尖叫場面，但她已經減了些少。