被爆好「食」女，曾一腳踖5船嘅張致恒（Steven）形象大插水，加上負債纍纍，被債主Naomi公開追數，身敗名裂得冇晒Job做，但為咗養妻活兒及還錢，近日密密返內地登台，雖然仔細老婆嫰，但為咗跑街數就連拳賽都唔放過。鍾培生及林作今日出席拳賽記者會，席間宣佈張致恒會與網絡紅人大J對戰，Steven透過短片表示希望藉拳賽讓大家看到他想改變的決心，現在每日跑步練拳，望盡快成功減磅。睇嚟Steven想效法崔建邦，利用打擂台嚟成功洗底喎！

Steven片中說：「我要多謝太太及家人支持，如果冇佢哋嘅支持，我都冇勇氣上台打比賽，第一次上台打拳，無論贏輸都希望得到大家嘅掌聲！」大J直言原本不想參加，但聽到對手係Steven後便答應，皆因對方愛喺大灣區唱歌及參加生日派對，故值得一戰。

回顧2009年邦邦因涉嫌毆打舊愛鄺敏慧而形象插水，工作全面叫停，其後因酒後駕駛及涉嫌無牌駕駛等，最後他用一年時間上擂台，做打拳節目《我的志願》，令他重新面對自己。