樂隊ToNick將於明天及後天（3日及4日）舉行個唱《Here and Now》，練歌都要唞吓氣，4位成員包括主音恆仔、結他手小龜、低音結他手Ryan同鼓手晨曦就同《頭條娛樂》玩咗個「懷舊估歌仔」遊戲，玩法就係播出經典廣東歌，音樂會突然暫停，要佢哋緊接唱出下一句，測試吓佢哋對8、90年代嘅香港樂壇認識有幾多。9首歌有齊男女歌手同組合，作品好貼地嘅ToNick表現唔太穩定，一時又秒速答啱，一時又估唔中索性自己改詞，又自爆去日本鬼屋要唱歌定驚，究竟咩歌有定驚功能？組合歌嚟㗎。