肥嘟嘟鄭欣宜(Joyce)個食相相當吸引，從面部表情聯想到好味程度，網民隔住個「芒」都感受得到。昨日欣宜喺youtube自家頻道上載一條生活日常片，片中直擊day off嘅欣宜一日裏面所做嘅事情，包括下午去朋友店鋪揀水晶飾物、去探望契仔、夜晚相約大班朋友，其中一人喺加拿大返港，大夥兒去食Omakase（廚師發板），見欣宜一啖汽水一啖海膽，食得夠豪開心到不得了，除此之外，又食到廚師發板嘅特色魚生壽司、楊棟蟹洋蔥湯、膏蟹、鮑魚等，欣宜開心到手舞足蹈，掩面、舔手指、拍手掌乜都齊，仲唔怕失儀，火速舔埋啲鮑魚汁，相當搞笑，而她擒青搶食串燒行為，即被朋友喝止，怕她會拮親個嘴。Joyce猛話好好味，形容好食到嬲，好食到笑，更興起話好食到好想拍人，最後拍打身邊朋友個pat pat嚟「發洩」！

對欣宜嚟講昨日係好重要日子，因為她快要閉關拍新歌MV，𠵱家係時候放鬆一吓。以前欣宜乜樂器都唔識，她又自爆學緊彈鋼琴，啱啱學到第2堂，最想學到Chopin(蕭邦)，平時開住Chopin嚟聽心情會平靜啲，希望有日可以自彈自唱。