TVB舞動綜藝人真人騷《盛．舞者》昨晚播出第二集，以「共融」為題，正式進入故事及跳舞模式，讓各位舞界人士各自訴說他們的跳舞故事。1984年已參加霹靂舞比賽的主持錢嘉樂感嘆：「呢個世界已經係啲後生仔㗎喇，我哋老了，郁不到了。我參加霹靂舞大賽時，睇你都未出世，但我又真係想你哋參埋我玩，年輕真好！」另一主持Jace（陳凱詠）就鼓勵大家不要因為年紀大了放棄跳舞：「跳舞邊有分年紀㗎？只要你鍾意跳舞，可以跳一世都得。」


導師狄易達、麥秋成與王君馨亦作深情分享，當中達仔的故事感性又勵志：「細個BATTLE親都覺得自己會輸，我就用『紅帽』勉勵自己，叫自己熱血啲、唔好咁易放棄。因為學Breaking唔係日計，係以年計。學一個動作，可能一年先進步一個圈，要堅持住。平時唔跳嘅人，係幻想唔到嗰種辛苦，係出咗所有力，都未必得到，但唔用力，就冇可能達到，所以要堅持！」