東京奧運月底開幕，港協暨奧委會副會長霍啟剛近日頻頻出鏡，支持香港運動員征戰東奧。提到霍啟剛，自然想到「跳水皇后」郭晶晶，兩人已成為三個仔女的父母，他們接受賽馬會刊物《駿步人生》訪問，霍啟剛自爆當年死纏爛打「追國寶」，亦分享「湊仔經」，又話日後小朋友若堅持想做全職運動員，當然會支持。

原來04年郭晶晶在雅典出賽時，霍啟剛透過電視對晶晶一見鍾情，之後國家隊奧運金牌健兒來港，霍啟剛晚宴上兩次找女神合照，跳水皇后就疑惑：「點解影完又影？」。期後，郭晶晶去上海出席活動，霍啟剛跟住去上海，郭晶晶話:「之後無論我去到哪裡，又一定見到佢」。霍啟剛坦言，國家隊封閉式管理，要見伊人一面都好難，自己當時真是「死纏爛打」，最後以無處不在同無微不至的細心，打動女神。

兩人婚後非常甜蜜，平日喜歡結伴逛街市買餸，又會帶兒女感受鄉郊氣息。霍啟剛在社文平台分享，周末同家人在34度高溫下一齊行山踩單車，仲話「喺屋企成日叫小朋友慳水，當佢哋去大自然走一轉，就更加明白水資源嘅珍貴」，要小朋友知道自然資源對未來好重要。
訪問亦有提及霍家三代都參與體育發展，霍啟剛話「現在國家更重視全民健康、全民參與運動」，他正思考應如何令香港市民投入體育運動。郭晶晶都認同，認為多參與，先知自己有沒有天分。