33歲「創作歌手」金獎得主Jay Fung(馮允謙)跟較他年輕9年嘅「人氣王」MC(張天賦)最近合唱英文歌《反對無效》嘅英文版本《How Many Times》帶出驚喜，兩人唔單止把聲perfect match，仲畀網民大讚靚聲，假音位轉得好犀利，兩個都唱得超級好聽。MC x Jay Fung首歌畀網民形容係正到癲，最愛嘅世紀大合作，不停狂loop！所以歌曲上載咗只係短短5日經已有22萬5千網民觀看。

網民仲戥遲咗起步，滄海遺珠嘅Jay Fung不值，覺得香港樂壇欠他一個「膠袋」(交待)，指他唱歌咁好聽，真係浪費人材；亦有指MC唱英文真係好正，係全能新人！

呢首歌有唔少網民留言：「兩代香港R&B歌手合作真係好正！完全睇唔出差10年，Jay果然歲月不留痕！」、「我係一個麻甩佬，聽完之後我懷孕了。」、「MC真係新人咩？ 有技巧有感情又夠穩，同前輩唱都完全唔怯，前途無量，Jay Fung好有實力可以進軍國際市場。」、「狂loop 真係唔知聽咗how many times。」