音樂選秀節目《冤枉新秀訓練營》進入stage 2的「跳唱對決」，請來經理人霍汶希（Mani）、容祖兒及《全民造星3》冠軍折骨Ben（趙祥誠）擔任評判。
比賽前，問到三位評判的評審取向？Mani率先表示自己最看重觀眾緣，「因為有觀眾先至有人鍾意；第二就係手腳協唔協調，跳舞唔一定要好叻，但手腳協調先有機會好叻；第三就係唱歌有冇天份，唔係因為佢依家唱得好叻，係佢有冇天份可以變到好叻。」
祖兒則着重他們台上表演的自如度，「正常係會緊張，但係點樣令到坐喺度嘅觀眾感覺到佢好認真去完成呢個演出呢？唔係淨係得個驚字呢？各方面整體有冇一啲咁樣嘅潛質，覺得佢係一粒有待被發掘嘅珍珠、種子。」
至於擅長跳舞的Ben當然以跳舞為標準，「協調同美感，動作嘅連貫性，要尊重呢個舞台，投入去做你表演嘅每一樣嘢。」