為慶祝資料館成立20周年，新城電台找來由家燕姐及思敏主持《光影夢工場》，邀請到胡楓（修哥）及麥秋成當嘉賓，大談歌舞片入行的經歷兼分享難忘事。入行70年的修哥素來有「舞王修」之稱，參演超過300套電影，2003年得到香港電影金紫荊獎的終身成就獎，早前亦成為踏足紅館的最年長歌手，成績輝煌。回想起入行經過，修哥坦言幾乎失敗︰「當年睇報紙見到廣告有招考男女主角，所以寄相去試做演員，點知冇回覆，原來寄失咗，所以我收唔到。第二次再寄信約我去見面，見面期間電影公司老闆問我係咪「漏口」，仲話「漏口」唔可以做主角，只可以做西瓜刨。」修哥反駁指拍攝時就不會「漏口」，老闆對於從未拍過電影的修哥半信半疑，但都依然給修哥一個面試的機會，殊不知面試時，修哥就變了另一個人，他笑說︰「我係1號，同2號參加者一齊試鏡，點知2號Out咗，我就留低同3號繼續試，如是者我由第一個試到最尾，最後仲傾合約。屋企人當時反對，覺得拍電影係貪威識食，仲覺得無理由輪到我。」結果，修哥第一套參與的電影就當了男主角。