(星島日報報道)以游泳為主題的青春偶像劇《I.Swim》正式開拍，男主角呂爵安（Edan）日前現身訓練池拍外景，半裸上身的他雖然冇六舊腹肌，但練出結實胸肌兼手臂的他，拍攝期間來回泳池游足十幾圈都面不改容，專業！

　　今次是一套青春又熱血的偶像劇，並以游泳為主題的劇集，由馮志強執導，改編導演的自身經歷，講述兩個青年泳手，展開一段亦師、亦敵、亦友的競賽，劇集預計下年播出！

　　今次劇集演員有心理準備要除衫拍落水戲，為了以最佳狀態示人，男主角Edan早在一個多月前秘密操肌，又配合劇組安排密密練水。上個月Edan曾經在IG罕有地分享自己半裸上身的相片，忍不住和粉絲分享自己努力的成果，還笑言自己是「24年最fit嘅一次」，希望繼續操Fit變成「大隻安」，令一眾「爵屎」十分期待偶像的演出！

　　經過一個月特訓，劇集正式開拍，早前劇組在訓練池取景，首日開工的Edan半裸上陣，在泳池和工作人員齊齊研究走位和拍攝角度。另一日，Edan則一早到達拍攝場地，吸引了很多街坊圍觀，為免影響拍攝進度，劇組決定用黑布將泳池外圍遮蓋，而全程投入拍劇的Edan就戴住泳鏡泳帽，着住黑色短褲兼半裸上陣，大騷苦練出來的胸肌，現場所見，Edan先在池邊熱身一輪，一Roll機就二話不說來回狂游，游到導演嗌cut收貨，Edan才上水睇Playback。

　　為了開劇，Edan日以繼夜開工，又要兼顧組合的工作，忙到冇覺好瞓，但為了工作，Edan咬緊牙關死撐，工作人員透露：「今次劇組嘅開工時間非常密集，Edan試過朝頭早開工開到夜晚，接住凌晨又再開工，仲要不停浸喺水度拍攝，真係好辛苦！之前瞓唔夠兩粒鐘又要繼續為組合工作奔波，佢試過攰到差啲暈低！因為本身佢唔係好叻游水，都係苦練返嚟！」昨日，Edan大清早7時又現身限時動態，戴住口罩的他透露近日經常聽不到鬧鐘響，難怪會眉頭深鎖！