男團MIRROR人氣極盛，全香港九龍新界隨街都見到鏡仔嘅廣告，每次有商品推出佢哋嘅閃卡，勢必掀起抽卡、換卡，甚至係炒卡熱潮。噚日林海峰（Jan）都嚟湊熱鬧，喺IG上載一套MIRROR閃卡，而第一張就係全城最難抽中嘅團體閃卡，唔少鏡粉為咗呢套閃卡日食夜食炸雞餐，但阿Jan竟然可以垂手可得，真係令人非常羨慕。

阿Jan為咗將自己嘅地位提升到高過鏡仔，竟然「借花敬佛」送贈畀好兄弟嘅太太，佢留言話：「要令對方覺得你仲受歡迎過鏡仔，咪就係將成盒鏡仔送晒俾佢囉！#老麥送俾老林然後老林就送咗俾個老兄個老婆」。佢話今次日行一善，令收禮人開心到喊，hashtag：「#UNCLE日行一善AUNTIE涙光閃閃 #給人玫瑰手留餘香」。