著名填詞人黃偉文 （Wyman）有幾愛時裝全宇宙都知，舊年年尾佢又飛咗去時尚之都巴黎睇靚衫，亦因為咁一年一度嘅商台《叱咤樂壇頒獎禮》佢都冇出席，獲頒「填詞人大獎」都只能拍片講得獎感言。不過Wyman用字咁精講嘢咁叻，得獎感言一樣引起迴響，在片中提議可以舉辦唔計MIRROR嘅頒獎典禮，但其實都只係想同大家講：「無論日子過得幾艱難，都要揸實音樂同幽默。」
不過有啲時候，幽默都化解唔到問題，Wyman都要嚴正反擊呀！事緣前晚（10日）佢喺IG分享身穿毛毛靚褸嘅相，竟然有人唔知頭唔知路就留言：「死咗好多隻…」又加上個狐狸同喊嘅Emoji，仲有網民回覆：「好恐怖。」批評Wyman身上件外套用咗好多動物皮毛而製，感覺殘忍。
昨晚（11日）Wyman親自回覆呢兩位網民：「一嚟就假設我殺咗幾十隻動物同喊之前，不如check吓係咪整毛公仔嗰啲fake fur（人造皮草）先吖，check唔到可以問吓我吖。其實望落去假成咁都要咁講，你似乎都好鍾意演呢場戲，唔好而家先嚟話『同你講吓笑咋嘛』，你啲語氣一啲都唔似講笑㗎！」激嬲Wyman，該網民都say sorry，不過似乎冇乜誠意：「因為我覺得你唔會着假嘢，sorry law，錫晒你。」但Wyman就唔多受嘞，再回覆網民指呢啲留言可能毀壞佢名譽，而網民hea講對唔住都令Wyman覺得不滿：「我覺得正確答案應該係『咁我以後喺留言同指控其他人之前會小心查證吓先，非常抱歉』。」
事後Wyman又將留言Cap低Po上IG限時動態，但因為唔記得blur網民個名又repost多次，再表示：「我覺得人係應該為自己嘅comment同like負責嘅。」雖然想呢位網民多加注意，不過都唔想做得太過火，所以都del咗本來喺留言區嘅對話。
立即下載 | 全新《星島頭條》APP :https://bit.ly/3yLrgYZ
