因爆發第5波疫情，環星娛樂主辦嘅兩場張偉文《友情有義演唱會》、尹光《戲曲光輝演唱會》及莫旭秋《秋的懷念演唱會》被迫延期。環星老闆張國林聯同三位「苦主」對臨急煞停演出非常無奈，張偉文好友兼經理人方俊(Aman)只望改期不會影響票房，坦承張偉文會用歌酬來負擔6位數字嘅腰椎手術。採訪：方騫平 攝影：葉君海
環星老闆張國林(左起)、莫旭秋、尹光、Aman、張偉文(前)齊唱《無奈》，苦中作樂。
首場嘅《友情有義演唱會》仲請來姚煒做嘉賓。
原先三個演唱會都準備就緒，豈料演出前夕被煞停，大家都超級唔開心，莫旭秋(Joe哥)個唱更先後延期4次，尹光搞到成晚失眠，張偉文就睇得好開，話順其自然煮到嚟就食。
Aman呼籲fans要力撐張偉文，可以嘅話就唔好退飛。
擔心延期影響票房
負責統籌張偉文演唱會嘅Aman表示，去年12月20日，張偉文喺文化中心舉行首場《友情有義演唱會》表現好好，餘下兩場Show門票已全部爆滿，最擔心今次改期會影響到票房，呼籲fans要力撐到底：「因為呢幾場歌酬係佢嘅醫療費，用微創手術執走壓住喺腰椎神經線嘅一塊軟骨，由於壓到好扁，專科醫生希望術後對偉文有幫助，有返腳力可以企返起身，可以企喺舞台唱歌。」張偉文都想做呢個手術：「唱得就唱啦，有得睇好睇嘞，呢個世界變得好快，唔知跟住會點。」另外，尹光形容今次演出延期如同跌錢，因為一日未演出一日未有糧出，不過錢反而係其次，因為他好鍾意唱歌；Joe哥就阿Q啲咁諗，咁樣就冇咁唔開心。
張偉文剛做完腰椎手術，現正休息中。
張偉文首場個唱，Aman喺後台睇到實，不時咪前提示。
尹光及Joe哥對演出押後大感冇癮。
去年冬至正值張偉文69歲生日，Aman請埋姚煒、尹光及張國林跟他慶生。
立即下載 | 全新《星島頭條》APP : https://bit.ly/3yLrgYZ
