40歲余文樂（樂仔）自2017年與台灣模特兒兼皮帶大王千金王棠云（Sarah）奉子成婚，前年9月再追多個女，之後都專注家庭生活及主理潮牌生意，幕前工作係零。他跟老婆留台定居近4年，去年5月因工作終於返港，隔月就自爆因長期工作壓力而患上的驚恐症復發，但去年底開設YouTube頻道分享個人生活，見佢似乎好返好多嘞！而上月底，即係過年前記者見到佢同老婆、妹妹及妹夫一齊在中環行街狂掃名牌，之前台灣返港要隔離21日，一出關就係咁買，明嘅。採訪：張詠森

余文樂同老婆出街拖到實非常甜蜜。

余文樂兩公婆同妹妹、妹夫齊齊行街買衫。

當日下午，放低仔女畀媽媽湊嘅樂仔與家人在中環行街，去咗昔日好友沈嘉偉旗下服裝店幫襯。其實樂仔同沈嘉偉反面已經近5年，2017年有傳沈嘉偉因為好友郭富城唔鍾意樂仔太「世界仔」，而開始疏遠對方。同年樂仔宣佈結婚，搞婚禮亦未有邀請沈嘉偉等人。另外亦有指樂仔同沈嘉偉仲好老友時，搞個人潮牌都有問對方意見，反面之後，沈嘉偉以生意人身份搵樂仔合作卻被拒，被批忘恩負義。呢日見樂仔照去幫襯，作為潮人睇嚟真係靚衫面前無怨恨。

余文樂一行四人入名店愛馬仕行咗半個鐘，出嚟冇拎住標誌性橙色紙袋。

有傳郭富城曾稱余文樂是「世界仔」，沈嘉偉因而疏遠余文樂。

余文樂2017年傳出同沈嘉偉反面，隔咗咁耐冇晒事仲幫襯舊友。

見記者任影唔嬲

樂仔一行四人下午約4時現身中環，他們先到名店愛馬仕行足半個鐘，在店內與店員有傾有講，期間都有拎吓產品上手睇，不過最後卻不見他們拎住個標誌性橙色紙袋離開，唔知係買唔到心頭好，定買得太多直接送貨上門呢？正想繼續行街時，一向眼利的樂仔離遠已經見到喺對面馬路嘅記者影佢。以前樂仔發現被影必定黑口黑面，但可能做咗老竇成熟又隨和咗，家陣見到記者都冇話兜路走。當記者上前問他是否留港過年，他只低頭拒答，冇再黑面怒睥，更全程拖實老婆，非常甜蜜。