85歲謝賢（四哥）同70歲狄波拉（拉姑）離婚26年，但再見亦是好朋友，堪稱圈中離婚夫婦嘅模範。月前本報記者撞到佢哋現身主場即中環置地廣場，約埋成班好朋友，包括拉姑老公江耀城（鬍鬚Kong）及陳淑芬一家等一行十多名友人食Tea，鑑於疫情眾人未能坐同一枱（當時仍未實行二人限聚），拉姑同陳淑芬就不時遊走兩枱，睇嚟疫情都影響唔到大家敍舊呀！採訪：張詠森
鬍鬚Kong同四哥好好傾。
同場仲有陳淑芬（左一）同家人。
四哥永不言休，一有新作都備受關注，去年上映由他主演的《殺出個黃昏》大獲好評，日前奪得香港電影評論學會最佳男演員，更首獲金像獎男主角提名同林家棟及吳鎮宇爭影帝。平時不用開工的四哥生活悠閒，本報去年在淺水灣遇到他，當時只得助手陪散步兼歎啡，行動冇以前咁靈活，需要出動枴杖輔助，上梯級更差啲跌親。而呢日見四哥同拉姑用餐似乎比上次更精神，唔知係咪因為見到咁多老友在場呢？
四哥早前憑《殺出個黃昏》首度入圍金像獎影帝。
四哥上年被本報捕獲，但行入餐廳之際，心急得滯險跌倒。
四哥聽話戒口
四哥同拉姑坐埋同一枱，其間四哥不時望向樓下中庭的聖誕樹，周圍有唔少細路奔跑，可能令四哥諗起啲孫呀！拉姑負責睇餐牌為四哥點餐，唔知四哥係咪想點佢要戒口嘅食物，拉姑都作狀拍拍枱，似係唔俾四哥叫某啲嘢食，最後四哥惟有順前妻意思點餐，即係叫人揀其實冇得揀咁啦！互動十分有趣。
拉姑叫四哥揀嘢食，不過最後都由拉姑話事，應該知道晒四哥有咩唔食得。
叫陳淑芬揸機，影返張合照先。
拉姑貼身照顧
本身四哥同拉姑傾得興起，但老公鬍鬚Kong一到，她即讓座等老公同四哥吹水。二人一見面就打開話題，又各自指吓身上件靚衫。食到咁上下四哥先行離席，眾好友與他影大合照，四哥每行一步，拉姑都睇實兼扶實，又幫對方戴好個口罩，錫多啖先講拜拜。王力宏可能要問問四哥點解離婚可以咁愉快嘞。
四哥起身，拉姑即刻扶到實。
去門口影大合照。
拉姑幫四哥戴返好個口罩。
攬攬講Bye Bye！
走先啦，係咁先啦，下次再Tea啦！
四哥1979年迎娶拉姑，可惜於1995年宣佈離婚，但二人仍是好友。
四哥拉姑育有一仔一女：謝霆鋒及謝婷婷。
拉姑同鬍鬚Kong於2000年結婚，一直非常甜蜜。
更多第5波疫情資訊，請到以下專頁瀏覽
按此
立即下載 | 全新《星島頭條》APP : https://bit.ly/3yLrgYZ
