抗疫大使MIRROR連續4個星期五派出不同成員進行直播，昨（25日）晚由姜濤、邱士縉（Stanley）及楊樂文（Lokman）響頭炮，陪伴大家留家抗疫，半小時的直播最高峰吸納到3萬4千人次觀看。3子主要是「吹水」，話題由叫外賣到拍劇趣事，更不忘為Anson Lo（盧瀚霆）和Jeremy（李駿傑）的新歌宣傳，認真夠兄弟。姜濤雖然少開金口，但不時撥弄頭髮、在鏡頭前玩手指及微笑「嘟嘴」，怕凍的他在中段更索性蓋著被，賣萌派福利。
Stanley首先發言，笑大家不要只顧向姜濤和Lokman派心心，可發問令互動性更高。繼而問大家是否叫外賣居多？姜濤竟爆阿媽唔鍾意煮飯說：「我長期叫外賣，自己唔識煮，阿媽又有潔癖唔鍾意煮飯。」Stanley謂：「我搵到你容易致肥的原因，就是太重鹽和油。」搞到姜濤無奈嘆了口氣道：「無法，唉，無人煮，我鍾意食但唔鍾意煮，好麻煩，可能由細到大對煮嘢食有污糟的概念，煮嘢食會不停抹枱。外賣就來去幾間，因怕試新嘢會唔好食。」
聽到Stanley自言幸運的有人為他煮食，姜濤即謂：「無你哋咁幸福！」Lokman也稱跟姜濤同樣喜歡來回叫幾款外賣，並且會經常幫襯屋企樓下點心店的鳳爪排骨飯；Stanley則自爆人生最瘋狂是與姜濤在台灣拍劇時，試過整整一個星期的早晚餐都叫海南雞飯。繼而姜濤透露做直播前剛睇完Anson Lo的新歌MV，豎起手指公讚好睇；Stanley也即狂讚Jeremy的新歌MV拍得恰到好處，Lokman表示未睇但會睇，更呼籲大家要睇完再睇，睇多幾次；3子齊齊為成員宣傳，認真夠義氣。但問到何時輪到姜濤出歌？姜濤就指：「現忙拍劇無乜時間做歌，構思已在，逐步來，想慢慢打磨。」又承認經常是跑步萌生新歌概念。
當Stanley提到疫情期間多了時間，最近愛上看韓星Rain（鄭智薰）的節目、喜歡看對方的食相及晒肌，搞到自己很慚愧；姜濤則指多次重溫大家的表演，發覺每一首歌大家都有不同的小動作，幾好睇又可參考吓。
正與姜濤一同拍攝新劇《季前賽》的Stanley爆姜濤不停「撩」他劇中女兒，父愛爆棚，應該是想生個女！姜濤就指看到Stanley和Edan（呂爵安）拍攝時會不停進食，但自己就習慣拍攝時不會進食，但有次拍攝連鎖快餐店的宣傳片時不停炒薯條，還把薯條全部吃光，令劇組大感奇怪，全因第二天放假所以放任進食。
Stanley即強調並非他們不讓姜濤有飽飯食，又透露拍劇期間發生了一件永世難忘的事，就是患上腸胃炎，由於還有發燒故要用樽仔做檢測，幸好嘔完後無BB得一條線，但真的很辛苦；姜濤更稱看到Stanley不適連自己也患上腸胃性感冒要回家食藥。搞笑是當Lokman提醒大家要做足抗疫措施時，姜濤不停的笑，被Stanley取笑姜濤一臉想收工的樣子，其後3子也齊齊感激醫護人員，再為當晚的直播作結。
更多新冠疫情資訊請到以下專頁瀏覽：（按此）
立即下載｜全新《星島頭條》APP：https://bit.ly/3yLrgYZ
