已故天后梅艷芳的母親梅覃美金（梅媽）和兒子梅啟明去年尾因電影《梅艷芳》涉侵權的訴訟而鬧不和，二人關係跌至冰點，梅媽早前更登報與梅啟明脫離母子關係，梅啟明事後指梅媽受人唆擺，二人關係才會決裂，自己亦遭到經濟封鎖。
今日母子決裂事件再有新進展，梅啟明承認梅媽曾講過要脫離母子關係，但只是晦氣話，一直都沒有行動，登報是由梅媽的看護鄭姑娘所為，鄭姑娘更向他暗示是受梅家親戚指使，故他已就此事向警方備案，梅啟明曾指過年前梅媽已不肯接聽他的來電，又留在醫院避見，但本月25日他收到梅媽電話，稱在醫院打了第一針新冠疫苗，出院後會搞清楚一些事，但不知她幾時出院，梅啟明說：「我當時順便問阿媽點解搞登報，她話不知，於是我去查證，發現登報的是阿媽的看護鄭姑娘，我問佢點解，佢只係同我講『唔關我事，你屋企有幾多人吖，你自己知』，於是我心中有數，係我細佬個仔，即係我侄仔梅柏麟，我哋一齊住，所以尋晚返去問佢，佢無答我，話要搵鄭姑娘對質。」
問到是否因為這樣，梅媽不再給他每個月2萬元的生活費？梅啟明答:「我都查出嚟，係侄仔喺背後操控阿媽。（他可以處理梅媽的財政？）財政的事我一直無理。（咁你點樣認為他操控？）好簡單，以往新年阿媽都會畀利是，今年就冇，而家阿媽喺醫院，佢(侄仔)同女朋友就成日出入醫院，佢係咪把心一橫，要做阿梅的翻版呢？所以我第一時間去報警。」
問到有否證據？梅啟明說鄭姑娘是人證：「我都想搞清楚件事。（你估計到他的動機嗎？）阿媽每個月廿幾萬，啲錢去咗邊？你哋都知我有幾多，按情理係有問題，但之前都無多諗，而家爆咗件事出嚟，我先要行呢一步，要搞清楚幕後黑手係邊個。」又說會要求醫院交出進出梅媽病房人士的出入紀錄，否則會投訴醫院及興訟，至於會否和侄仔心平氣和去傾件事？梅啟明說：「無得傾，佢一向目中無人，無大無細，我個仔同佢打招呼都頭岳岳唔理。（他對梅媽的態度好不好？）唔知，佢都40幾歲人，食飯仲要阿媽幫佢搣雞，但阿媽當佢係仔。」並謂警方已受理案件，他一定會追究到底，再問到不打官司是否會獲梅媽原諒？他表示等梅媽出院再慢慢傾官司的事。
更多新冠疫情資訊請到以下專頁瀏覽：（按此）
立即下載｜全新《星島頭條》APP：https://bit.ly/3yLrgYZ
