TVB熱播的劇集《飛虎3壯志英雄》前晚（14日）播出第16集，劇情以感情綫為主。小魚余曉欣（蔡思貝飾）做完腦部手術6個月後終於醒來，高子樂（吳卓羲飾）即時趕到醫院見她；回復記憶的小魚感激高子樂對她不離不棄，並終對高子樂敞開心扉；原來小魚因父母離異關係對愛情欠缺信心，所以一直將子樂拒諸門外，但最終仍難敵子樂滿滿的誠意，子樂聞言則捉着小魚的手真情告白：「其實我第一次見你已經認定係你，我應承過自己以後都會照顧你。我高子樂可以發誓，我會一生一世去照顧你，呢個係我對你嘅承諾，講到做到。」
小魚（蔡思貝飾）終於接受高子樂（吳卓羲飾）。
最終兩人一吻定情，場面感人，網民亦大為感動兼留言：「小魚終於接受咗子樂，好感人呀！」、「呢一吻來得太遲」、「吳卓羲好癡情，有幾多男人做到吖？」可惜好景不常，昨晚（15日）播出的第17集，小魚因腦出血要做緊急手術，最終搶救不治，未能趕及見最愛最後一面的子樂遂抱着小魚痛哭；今次吳卓羲搣甩衝動本色，鐵漢柔情都有落淚時，吳卓羲多場爆喊戲均演繹得非常虐心，獲網民大讚。
有情人冇幸福結局，小魚（蔡思貝飾）最終搶救不治。
吳卓羲呢場爆喊戲獲大讚。
另一邊廂，張嘉軒（黃宗澤飾）與何家寶（陳瀅飾）感情則大躍進。事緣嘉軒、家寶跟蹤金智海（羅孝勇飾），過程中家寶被弄傷雙眼，嘉軒悉心照料家寶，兩人關係因而逐漸拉近、暗生情愫。黃宗澤與陳瀅劇中親密互動成為亮點，其中一幕黃宗澤背着陳瀅通街走的場口，及帶陳瀅看跌打時借手臂給她咬着忍痛的一幕，二人均演繹得頗甜蜜，甚有CP感；網民亦大讚二人合襯：「陳瀅好可愛！」、「Sweet到糖尿！」、「黃宗澤、陳瀅呢一對好睇順眼、最合襯，令人睇得好投入。」
張嘉軒（黃宗澤飾）同何家寶（陳瀅飾）呢Pair真係好襯。
更多第5波疫情資訊，請到以下專頁瀏覽（按此）
立即下載｜全新《星島頭條》APP：https://bit.ly/3yLrgYZ
