4月11日，大致天晴，但早上時間多雲，日間天氣炎熱。俄烏戰事進入膠著狀態，美債息高企，道指上周五個別發展，道指升137點；標指跟納指則分別跌11點及186點。不過港股ADR跟夜期則偏軟，由21900水平回落，新加坡黑期更跌至21700點水平。上周納指累跌5%，主要係受到聯儲局放鷹所影響，雖然加息經已係市場共識，但資金加快撤走，市場避險情緒高漲，資金加快從風險資產流走。本周將會有更多聯儲局委發表講話，料加息因素將繼續困擾美股。

至於港股繼續受美股跟A股兩面夾擊，A股上周表現較為疫弱，港股失守22000點後，遲遲未能收復，成交隨住復活節假期而縮減，市場入市意欲減弱，暫時亦未見有明確方向，恒指本周可能繼續上落，留意上周五牛證顯著加，21200至21500點大量牛證結集，唔排除借任何稍為利淡消息向下屠殺呢批牛證。而熊證方面，雖然22000點新增熊證，數量剛好係22500至22700所減少嘅數量，但整體而言，由21100至21300點所增加牛證數量較多，唔排除先殺牛。除非內地突然出手減息降準，否則未有條件可以向上一舉屠殺22500至22700嘅重熊。

中央隨時出招救市

內地繼上海封城後，近日廣州也深化抗疫措施，續惹來國際關注，除有國家撤離人員外，人民銀行調查統計司前司長盛松成亦憂慮疫情衝擊內地經濟恐變長期化。正值本周起內地陸續公布數據，包括3月份通脹、外貿及首季經濟表現。有分析指內地經濟或出現滯漲，預期中央隨時出招救市。

今年首季雙雙躋身全球首次公開招股(IPO)最大集資地三甲寶座的上海及深圳證券交易所，面對疫情「封城」難關當前亦無計可施。根據內媒估計，喺盡職調查及訊息收集遭受阻礙嘅情況下，多家中資公司已被迫暫停或減慢喺滬、深兩市嘅上市計劃，牽涉到600億元集資大計「凍過水」。預示企業投資能力將會被削弱，減慢經濟復甦嘅速度。喺咁危急嘅情況下，預期人行隨時出招，雖然暫時淡友佔盡上風，但一旦阿爺出招減息降準，好友亦會反擊，本周港股有機會係好淡通殺局面，無論做好做淡都難博。

古天后

(徐狄怡，證監會持牌人)