MIRROR的AK（江𤒹生）繼前年拍攝《打天下》後，最近再為ViuTV新劇《死角》孭飛，劇中他跟隊友Lokman（楊樂文）和Tiger（邱傲然）飾演同一西洋拳館的師兄弟。因為疫情，該劇拍攝一度延期，近日終正式開鏡。前晚（20日）拍攝一場戶外拳賽戲份，AK半裸上陣由捱打倒地到最後打贏對手，外形似足真拳手，而劇組亦邀請數百fans飾演觀眾，加上路經嘅街坊，場面相當熱鬧。撰文：杜杜 攝影：沈健程
該劇改編自同名漫畫，本安排農曆年後開鏡，但撞正第5波疫情被迫延期，近日低調開始拍攝。劇中飾演西洋拳拳擊手的AK、Lokman和Tiger有不少打拳戲，而前晚講述AK飾演的「歐陽駿」參加「明日拳王爭霸戰」的戶外拳賽，教練梁祖堯和一班師兄弟 Lokman、Tiger和旨呈，以及蘇麗珊、龔慈恩女兒林愷鈴和湯駿業等都有到場教路及打氣。
AK做拳手入型入格
劇組一早在觀塘海濱搭了擂台景，當晚約6時一眾演員陸續到場。甫開始即拍AK對賽戲，最初講AK一直處於下風，除了狂中拳外，更一度被對手打到不支倒地，要拉住繩欄才起到身，更要Lokman出手扶。不過經梁祖堯和Lokman教路後，狀態回勇，最終在一輪瘋狂出拳下打贏對手，全場歡呼，一班師兄弟亦一擁而上擂台，攬住AK慶祝。
現場見AK為演好拳手角色，下過一番苦功，保持到拍內褲廣告時的fit爆身形，凹凸分明的朱古力腹肌亦非常好睇，綵排期間跟對手對打時，見他無論走位步法到出拳姿勢都勁度十足，似足真拳手，就算重拍多次都表現得好有活力。他全晚亦不錫身，除了親身上陣，停拍時亦冇要求加衫遮遮掩掩，fit爆Body任fans睇。
逐個多謝Fans幫手
當晚拍攝邀請了數百fans扮演圍觀的觀眾，所以拍攝時AK無論被打或是打中對手時，觀眾的反應都非常真實，最後AK打贏一刻，全場歡呼聲之勁，可以媲美演唱會現場，就知fans睇得幾咁肉緊。拍至翌日零晨12時，fans戲份已完成，而AK、Lokman和Tiger亦相當識做，先輪住揸咪跟fans講多謝，做慣隊長的Lokman更細心補充：「大家都辛苦嗌足咁耐，返去飲多啲水，早啲休息。」AK就算拍到好攰，亦連聲向fans講多聲。之後三子再走晒擂台四邊，跟不同位置的fans大合照，𠱁得fans勁開心。
更多第5波疫情資訊，請到以下專頁瀏覽 （按此）
立即下載 | 全新《星島頭條》APP :https://bit.ly/3yLrgYZ
