「你帶走咗（哥哥）去陌生環境，又滴唔到藥水，又唔肯食嘢，我驚佢身體情況惡化得好快。」西環屈地街一間麵廠的少東杜先生，15年前飼養唐貓「哥哥」至今，一直視如親人，感情深厚，但前日（21日）「哥哥」被人抱走後，音訊全無仍未「回家」，言談間多次展現憂心之情。
杜先生透露「哥哥」愛曬太陽，所以每日中午12點至下午3點，他們都會放「哥哥」到舖頭外的空地，每隔半小時左右，都會了解「哥哥」的情況。他憶述，「哥哥」失蹤當日，他如常放「哥哥」到舖頭外放風，至大約2時半仍然見到「哥哥」在曬太陽，所以未有為意，但半小時後卻未見「哥哥」再回來，「一路到夜晚都無返來，到第二朝有街坊同我哋講，話隻貓俾人抱走，所以就報警。」
杜先生稱很多街坊及義工都知道「哥哥」是由麵廠所飼養，加上戴有頸圈，應該不會被誤當流浪貓，「好多人都認得隻貓係我哋，一定唔會貿貿然抱咗去囉。」
他指「哥哥」今年已經20歲，患有心臟病，兩年前曾中風，早前更發現患有淋巴瘤，身體非常虛弱，「兩年前中過一次風，郁唔到好嚴重，好好彩佢奇迹好返，陪多我哋兩年，但最近檢查照到有淋巴瘤，鼻腔呼吸道感染，持續幾個月都唔好，醫生都估佢個鼻可能有腫瘤，所以令佢感染 一直都唔好」。
杜先生續指，雖然「哥哥」不用長期食藥，但因鼻腔感染，需每日滴抗生素及類固醇藥水，再次希望抱走「哥哥」的女子能夠完璧歸趙，讓人貓得以團聚。「佢病咗之後食得好少，你就咁抱走佢，佢唔食嘢，一兩個禮拜身體好快就唔得，求下佢盡快畀返我啦，或者靜靜雞放番喺條街，隻貓都會識返嚟」。
警方昨日表示，接獲一名姓杜34歲男子報案，指麵廠內一隻貓不見了，懷疑被人偷走。案件列作盜竊，交由西區刑事調查隊跟進，暫未有人被捕。警方正追緝一名涉案女子，案發時她身穿藍色裙。
立即下載 | 全新《星島頭條》APP : https://bit.ly/3yLrgYZ
