由「日劇天王」木村拓哉領軍的全新月九日劇《邁向未來的倒數10秒》在亞洲掀起新一輪煲劇熱潮，余德丞（Dickson）近日離開TVB，即獲Do姐（鄭裕玲）帶挈客串主持《口水多過浪花》，二人在節目上大放笑彈，其間Do姐不但自認係木村「女友」；還激讚劇中女角表現突出，日劇回憶返晒嚟！
愛足26年 情定《悠長假期》
平成時代是日本影視文化的黃金盛世，資深日劇狂迷Do姐自揭早已鍾情日劇：「前幾日講完我嘅韓國第一個男朋友孔劉，今日就想講吓木村⋯⋯」豈料拍檔卻笑指Do姐見一個愛一個、情感「濫交」，激得Do姐隨即反擊：「濫交得過你？你個渣男！」引發全場爆笑！Do姐笑言早於木村出道初期已被「萬人迷」迷倒：「我要講嘅係我嘅日本男朋友木村拓哉，我由1996年睇《悠長假期》開始，已經被深深地吸引！」
提到木村從影以來首度飾演拳擊手，Do姐認為他勇於挑戰，給予極高評價：「我上網摷過，佢做過廿幾份職業、乜都做過！今次佢做一個落魄拳手，我睇嘅時候好開心，覺得木村係一個好努力嘅演員，佢拍咗劇30年，一直都有劇集推出，同埋每次都搏到盡！依家佢都步入中年，今年49歲、兩個女都咁大喇，但係仍然有新嘢帶畀觀眾。」
大讚劇集演員陣容華麗
除了「日劇大神」加持，Do姐還大讚該劇陣容華麗，尤其女角陣容更是她的心水：「女主角滿島光，係我好鍾意嘅女演員，佢同木村做戲，好有自己一套；同埋我鍾意內田有紀，因為佢男朋友係柏原崇，佢以前同中山美穗拍《情書》，之後好多年無拍戲、後來同內田有紀拍拖，𠵱家做咗佢經理人𠻹，我真係好八卦！」Do姐更指尊尼事務所旗下男團「King & Prince」高橋海人、山田杏奈，以及主演級人馬波瑠和安田顯有份參演，為劇集生色不少：「好多代嘅演員都喺度，好多大粒（巨星）、好多memory！」而Dickson則欣賞劇情融入民生話題：「劇中木村間串燒店因為疫情結業，我覺得劇集加入疫情（元素），變得好貼地、會更有感受！」
更多新冠疫情資訊，請到以下專頁瀏覽按此
立即下載 | 全新《星島頭條》APP : https://bit.ly/3yLrgYZ
