大家都知張敬軒（軒仔）家有一位可愛的遮遮（工人姐姐），平時煮出不少極具創意的菜式，令軒仔哭笑不得。今日軒仔為本月舉行的紅館騷練Band，突然收到遮遮訊息，話買咗500KG咖啡豆，即時嚇到Band都唔練，仲話血壓飆升。
話說軒仔昨日（6日）見家中啲咖啡豆就嚟用晒，於是同遮遮講：「我諗我哋要買返啲咖啡豆嘞！」遮遮仲覆佢話冇問題，今早軒仔喺大抽細抽、裙甩褲甩的情況下外出前，遮遮仲問軒仔要買幾多咖啡豆，軒仔以過往買咖啡豆經驗，兩三包都係得500G左右，於是就對遮遮說：「買多啲喇，睇吓佢哋有幾多，要晒都得，可以帶去紅館畀啲同事用。」於是……就出事了。
軒仔練練吓Band，收到遮遮訊息，「Hello sir,bought the 500kg sir,thank u sir.（你好Sir，買咗500公斤，謝謝。）」軒仔於IG分享當下反應：「我嚇到即刻嗌停隊Band，出去打畀佢叫佢千祈唔好做傻事…佢仲要Thank You Sir，Don't Thank Me Thank Yourself.」仲話一切都係自己錯，求遮遮唔好用咖啡嚟罰佢，如果真係買500KG，真係飲到出年都未瞓得着，仲Hashtag「紅館CoffeeShop」，又話Encore可以由噴紙花改為噴咖啡豆，畀遮遮嚇一嚇真係唔飲咖啡都提到神呀！
而網民與不少圈中人的留言同樣好笑，「買咗塊田咁多」、「500KG Coffee shop都用唔晒喎，真係唔租倉都唔得」、「飲足10年」、「睇嚟佢驚你唔夠精神唱歌跳舞」、「買咖啡豆都可以提到神，勁」。更有Fans話建議軒仔，可以畀觀眾憑門票換咖啡豆，又或者到時紅館入場每位觀眾派一杯咖啡。
更多新冠疫情資訊，請到以下專頁瀏覽 按此
立即下載 | 全新《星島頭條》APP : https://bit.ly/3yLrgYZ
