今日是母親節，圈中一眾孝順仔女都紛紛出Po，祝媽媽「母親節快樂」，不少明星更分享自己童年與媽媽的合照。森美今日於IG分享自己身穿校服，兒時與媽媽的合照，「母親節快樂，一睇我嗰陣時個樣就知我難教啦！我有今日，多謝媽咪。」更表示昨日（7日）已預早跟媽媽慶祝，今日再公開祝媽媽快樂健康，又稱昨晚（7日）唔記得Kiss媽媽，而家公開補番。但網民重點就放在森美以前個樣度，話完全認唔出係森美，又話佢真係愈大愈靚仔，咦？咁即係話森美細個個樣……又有網民話森美個樣似係被迫影相咁，不過點都好，可以肯定嘅係佢對媽媽嘅愛係真嘅！
近日忙於舉行《LIVE BY THE HARBOUR》音樂會的RubberBand（RB）主音6號（繆浩昌），今年是其母離世後，他經歷的第3個母親節，這天他亦於IG出Po，表示：「媽媽，母親節快樂！老實說，您走後每次唱《未來見》都有好大難度，綵排時我就失守了，但我之後還是會好好唱的，唱到最遠，您定會聽到的。」並感謝您總在天上眷顧著我們。其實去年他於《RubberBand Ciao 2021》演唱會，都曾剖白喪母心情，在台上一度爆喊，這段時間都靠寫歌記錄和抒發心情。
而14歲就喪母的姜皓文亦上載與媽媽唯一的合照，「妳在遠方的另一個世界過得好嗎？媽，我想妳。」並祝願天下母親健康快樂。洪永城就受疫情影響，3年冇見過媽媽，「我喺香港，你喺台北，無見三年，好彩見你都生活得精彩，一時又喺廣場跳舞、一時又去上哲學堂送啲金句畀我、又啱啱去完澎湖旅行、又叻叻識得執相P圖。」又話媽媽高興，他就高興，去年底榮升人父的他，亦向媽媽表示：「好快見面，孫女等緊你。」
另外，洪卓立、薛凱琪、范冰冰、楊丞琳、楊潮凱、胡定欣、王梓軒等都上載與媽媽的合照，祝賀母親節快樂。而與霍建華育有一女的林心如就在IG分享，相信是女兒送的手造小禮物，並留言：「謝謝寶貝。」睇嚟好冧呀！
更多新冠疫情資訊，請到以下專頁瀏覽 按此
立即下載 | 全新《星島頭條》APP : https://bit.ly/3yLrgYZ
