生日慶祝最重要盡興。有網民指，日前與朋友光顧中環一間高級日本料理餐廳用餐，同場一對母子正慶祝生日，並請全場客人吃蛋糕；樓主原打算離開時再道謝，怎料港媽就發難走過來怒罵及取走其蛋糕，令場面非常尷尬！
該網民投稿至社交媒體Facebook專頁「生仔要考牌系列」，指上周五（6日）與朋友兩人光顧中環某間高級Omakase日本料理餐廳，全場可容納最多12名客人。用餐期間，餐廳經理突然拿來兩件芝士蛋糕，原來是坐在最遠那枱一對母子正在慶生，「多咗嘅蛋糕請我哋食」；樓主當時雖然已吃飽，但基於禮貌沒有拒絕，由於與該對母子中間隔著5至6名食客，便打算離開經過時再道謝。
不過餐廳經理其後突然上前邀請她們向生日的客人道賀，「不如你哋講聲生日快樂？」，樓主與友人當場呆一呆，此時其他客人即大聲高呼「多謝晒呀！Happy Birthday」。其後該名以闊太裝扮的港媽卻發難稱，「今日我個仔（貌似16至17歲）生日呀，所以請埋你食蛋糕，我可以揼咗佢」。樓主為息事寧人便即向對方表示歉意，「唔好意思呀！頭先見你哋傾緊計。生日快樂呀！多謝晒」。
再過一會，港媽竟再度發難，「旋風式走埋嚟，伸手拎起嗰兩件蛋糕」，更充滿敵意地表示「你哋唔鍾意我個仔，件蛋糕我會揼咗去，唔駛你哋食」，令現場氣氛變得尷尬。開心飯局亦瞬間得無癮，遂迅速埋單走人，臨走時經理充滿歉意地不停表示「真係唔好意思，我都唔知講乜好」。
樓主指，與該對母子為陌生人，「有乜嘢鍾意同唔鍾意嘅咩？我哋做錯乜？我哋餐飯又唔係你俾錢」，又質疑怎樣做才能令港媽滿意，「你想我哋做乜？同你個仔唱生日歌？你個仔生日其實唔關我哋事。唔駛我哋七星拱照咁圍住佢賀佢生日吓嘛？呢度又唔係你包場同你個仔慶生」，最後更諷刺稱「我心中只默默祝福佢仔仔將來嘅老婆」。
帖文引起網民熱議，不少人都批評港媽的行為非常騷擾，「唔講以為個阿媽請全場食今餐」、「打擾人哋食飯仲毫無廉恥去發人脾氣」、「其實都講咗生日快樂啦，仲想點」，有人笑言「我淨係見到『寂寞的太太』」、「要幾寂寞先逼陌生人一齊慶祝生日」。另外有網民擔心衛生問題，「一班人冇戴口罩，在嘻嘻哈哈笑聲中，加埋壽星仔吹啖氣去整熄蠟燭，我真心唔敢食」。
資料來源：「生仔要考牌系列」FB
立即下載｜全新《星島頭條》APP：https://bit.ly/3yLrgYZ
