曾比特（Mike）在《聲生不息》節目中演唱80年代歌曲《初戀》在內地爆紅，日前接受港台《舊日的足跡》訪問時直言感到不知所措，Mike說：「我唔覺得紅定唔紅，冇太大概念。最想戴住頂帽去旺角買格仔餅食。我只係一個普通人。如果要用四個字嚟形容，就係『不知所措』嘅感覺。」
Mike一向熱愛唱歌，中三那年獲得校內歌唱比賽冠軍，但沒有因此讓他增添自信。他坦言從小到大自覺「唔靚仔，而且太肥」，對自己的外型沒有信心。當年參加《全民造星ll》也考慮了很久。「我參加呢個節目唔係因為姜濤效應，而係佢（節目）畀到我一份熱血嘅感覺。報名時我坐喺公司電腦前沉思咗一個鐘，填表後再諗多一個鐘，先決定『算啦 send啦』。」他感謝媽媽一直鼓勵他放心去做，希望由長沙回港後能送一張自己的唱片給媽媽，亦盼望可以去紅館開演唱會。
「爆炸頭」是Mike的標記，原來是遺傳自曾媽媽，全家人只有媽媽和他是天生「鬈毛」。對此，他覺得麻煩多於喜歡，故自兒時直至中學都把頭髮「剷青」，長大了才留長髮。他笑言自己要一段時間才能接受這個髮型，想不到現在它竟成為了標誌，希望它可以保持到60歲！
提到Mike跟林子祥合唱《單車》憶起亡父。「爸爸喺我10歲時走咗。我5、6歲先由汕尾到香港同家人團聚，期間4年爸爸好忙，大家見面唔多。收到消息嘅時候，我上緊堂，學校職員帶我去醫院，我唔知發生乜嘢事，喺的士上我唔明佢講乜嘢『冇事冇事』，去到醫院就見到媽媽同姐姐喊到死去活來，原來爸爸已經走咗......我最難忘嘅就係我喺汕尾讀咗一個學期嘅一年班，喺香港再重讀幼稚園。當時我最希望爸爸接我放學，因為佢會一手抱起我騎膊馬，好高，好開心，跟住我地會去行吓商場......」
Mike現年28歲，現時身處長沙，坦言好掛念女朋友。「我哋喺教唱歌嘅時候認識，而家感情愈嚟愈好，梗係要畀安全感佢。溝通好重要，為咗畀定心丸佢，我買咗部琴係酒店練習，基本上我大部份時間都喺酒店房間。我哋拍拖差唔多六年，我希望盡快結婚，但諗起而家係（事業）起步階段，必須考慮將來嘅生活，（現在）要更加努力。我喜歡佢因為佢唱歌好好聽，無論生活上、舞台上佢都係一個好charm嘅人，成日都有一個好吸引人嘅笑容。我鼓勵佢參加比賽，但係佢好怕醜。」
更多新冠疫情資訊，請到以下專頁瀏覽按此
立即下載｜全新《星島頭條》APP：https://bit.ly/3yLrgYZ
