MIRROR的盧瀚霆（Anson Lo）早前推出Solo新歌《King Kong》，今次繼續有Edward Chan監製、Oscar Li填詞，但作曲人則找來外國多位音樂人Willie Weeks、Ninos Hanna、Jonna Hall合譜旋律。不過外國音樂人的創作方式與風格都跟Anson Lo以往的作品有不同，歌詞方面，亦因應旋律的特性而變得猶如急口令。
在過去的作品中，Anson Lo都會挑戰複雜的舞步，但今次跟排舞師Rock Sir溝通後，選擇了大手大腳清晰的步法，Anson Lo說：「我哋諗舞步時會諗King Kong形象係咩？應該會有不同嘅動作，甚至係打自己心口。我哋就將呢啲元素擺入歌裡面，同用前臂比較多。」雖說舞步較以往的歌曲簡單，但由於動作幅度大，在拍MV時反而增加了難度，Anson Lo說：「MV裏面有一件衫有銀色扣披住，係Stylist團隊將逐個拉鍊扣針埋一齊形成個披，因為好多唔同金屬扣拼埋一齊變得好重，一郁感覺就似做Gym舉鐵，比起排舞室着Tee跳會難好多，加上扣與扣之間有細扣Fix死，但拍MV時細扣鬆開或叉開，會刮到我啲肉。」Anson表示，不少「神徒」（Anson Lo Fans）見他在社交平台出Post時，都眼利見他有疤痕，其實都是拍MV刮傷的。
在兩天的拍攝中，Anson Lo亦真的有受傷，不過他表示只是小意思。Anson Lo回憶道：「其中搭升降機一幕，製作團隊做咗一個生鏽鐵籠，因為上面好多生鏽物料，我要對嘴拍Mood Shot，唔能夠就住，否則唔夠有型，所以就會一嘢揩落去、摸落去，最終搞到隻手𠝹到爆血，感覺似一把刀𠝹開，但只係皮外傷，唔係好痛。」
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
