人氣獨立歌手Tyson Yoshi 向來極愛收藏一個美國知名銀飾品牌，甚至會定期拎出來清潔保養，珍而重之。原來張敬軒亦是這個品牌的發燒友，最近軒仔與Tyson Yoshi 甚為老友，除邀請對方任演唱會嘉賓，孖住半夜開live傾足5個鐘 ，早前更借出百年大宅給Tyson Yoshi 拍MV。適逢Tyson Yoshi 本周日(17日)28歲生日，軒仔大手筆驚喜送上價值六位數字的厚禮，認真闊綽。
Tyson Yoshi 在IG限時動態晒出禮物，片中所見禮物鋪滿整個梳化，當中除了有背囊、大大小小的皮革用品，還有銀器飾物，全都是這個品牌，保守估計價值六位數字，相當誇張，壽星仔興奮寫道：「黐線佬，多謝大佬送嘅禮物。」其中一個袋，Tyson Yoshi 更即時孭出街用。
軒仔曾邀Tyson Yoshi 做個唱嘉賓。
Tyson Yoshi 收軒仔六位數禮物，忍唔住叫佢「黐線佬」。
當Tyson Yoshi 收到禮物後，軒仔亦有於社交網表示這些都是他「斷捨離」的物品，現在將愛轉贈，並多謝Tyson Yoshi收留它們，他寫道：「人生嚟到斷捨離嘅階段，希望可以將一啲曾經帶過快樂比自己嘅物品送俾喜歡佢哋嘅人，從而將嗰份快樂再傳遞落去。喺自己細個啲嘅時候，有啲物品有時都係令自己再努力啲嘅動力，而家即使將佢哋收埋咗嘅時候，拎返出嚟望住佢哋依然會記得嗰個時候嘅自己。我好開心可以見到自己當時擁有呢個物件嗰陣時嘅嗰個笑容重新出現喺另外一個人嘅面上，嗰份滿足感係比滿足更滿足。好多謝你收留佢哋 @tysonyoshi」
其後，軒仔不忘發揮搞笑本色，表示原本想送條毛畀壽星仔，他寫道：「我本身都想送條毛畀你，但係開show 嗰陣時剃晒，依家都未到可以收割嘅時候。#腳毛」。
軒仔斷捨離，將所愛銀器飾物轉贈給Tyson Yoshi。
Tyson Yoshi 向來都有收藏該美國知名品牌銀器飾物。
收到生日禮物，Tyson Yoshi 即時拎咗其中一個袋孭出街用。
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
