張偉文死過翻生後上周首開Show，全院滿座感動得一上台就爆喊。
Previous Next

今年2月，69歲「靚聲王」張偉文(Donald)確診新冠肺炎送院，幸好大步檻過！上周三(20號)晚，Donald於沙田大會堂為《友情有義演唱會》補場，亦是病癒後首個個唱。《頭條娛樂》記者獨家直擊演出前後過程，Donald眼見成個Hall都係知音，感動爆喊咗3次，完場時仲被過百鐵粉包圍「集郵」，多得Fans支持令他回復精靈狀態，開心揚言要唱到上紅館。採訪：方騫平 攝影：沈健程

張偉文見到知音好感動。
張偉文見到知音好感動。
張偉文一上台見到座無虛席忍唔住喊。
張偉文一上台見到座無虛席忍唔住喊。

張偉文留醫期間發燒唔退兼半邊肺花咗，幸好福大命大，不過，因為住院及康復期間長期「與世隔絕」導致失智症變得嚴重，試過喺老人院撼頭埋牆，5月初做網上演唱會時全程面黑，多次扭計發脾氣，要經理人方俊及助手呵完又𠱁。

因為之前長期「與世隔絕」，今年5月張偉文做網上演唱會時報心情好差。
因為之前長期「與世隔絕」，今年5月張偉文做網上演唱會時報心情好差。

期待有工開心情靚晒
事隔兩個半月張偉文再開show，團隊如臨大敵，方俊照顧周到，演出前先遞上羅漢果煲鹹竹蜂開聲茶及燒味作晚餐。當晚除咗換戰衣時怪叫一兩次外，張偉文好快變返四萬咁口，他直認期待有工作，所以心情好返好多。問到係咪每次演出都視為最後一次？他反應好快一口否定：「唔係喎！有信心會唱落去。」對張偉文出心出力嘅方俊見狀都鬆一口氣，他說：「其實我有畀補腦supplement佢食，食完係叻咗好多，之前仲搵埋周啟生、周小君及方麗盈幫佢練歌，佢𠵱家最開心係有得唱歌，有朋友帶佢出嚟飲吓茶，希望佢keep住向好。」 

當晚經理人方俊𠱁到張偉文係咁笑。
當晚經理人方俊𠱁到張偉文係咁笑。
演出前，方俊先遞上羅漢果煲鹹竹蜂開聲茶予張偉文開聲。
演出前，方俊先遞上羅漢果煲鹹竹蜂開聲茶予張偉文開聲。
方俊陪張偉文食燒味晚餐。
方俊陪張偉文食燒味晚餐。
朋友託何婉盈送上大利是，張偉文開心到展示勝利手勢。
朋友託何婉盈送上大利是，張偉文開心到展示勝利手勢。
周啟生(後排左一)、周小君(第二排左一)、方麗盈(第二排右一)、方俊(第二排右二)演出前幫張偉文練歌。
周啟生(後排左一)、周小君(第二排左一)、方麗盈(第二排右一)、方俊(第二排右二)演出前幫張偉文練歌。

肺部受損冇影響歌聲
不過，當張偉文一出場唱出經典歌《每當變幻時》及《舊夢不須記》時就失手爆喊，一度泣不成聲：「好多謝各位，好難得今時今日仲有你哋嚟捧場，本身有少少退縮，但有咁多人支持我，好感動，你哋好長情，只要有唱歌嘅一日我都繼續唱落去。」台下觀眾大嗌：「加油呀！」又叫他多啲開演唱會嚟慰藉心靈。此刻張偉文竟搞笑駁嘴說：「我驚再肥就郁唔到喇！」無處不在嘅黃夏蕙突然現身觀眾席，還送上打氣利是。而張偉文狀態回勇，就算肺部曾受損都冇影響歌聲，亦冇乜甩歌詞，跟兩個月前判若兩人。

除司儀安德尊，嘉賓有姚煒、姜蓓莉及顏聯武。
除司儀安德尊，嘉賓有姚煒、姜蓓莉及顏聯武。
夏蕙BB跑上台前，派平安利是畀張偉文。
夏蕙BB跑上台前，派平安利是畀張偉文。
方俊全程喺「秘密基地」𥄫到實，不時透過咪嚟傳送提示。
方俊全程喺「秘密基地」𥄫到實，不時透過咪嚟傳送提示。

姚煒未有時間探青霞
張偉文完Show後仍然精神奕奕，仲好好唱口，被推住跟現場觀眾影合照嘅短短幾分鐘路上，不停輕鬆地哼歌，又做賽後檢討說：「我覺得自己做得ok，有滿足感好好啦，𠵱家更有信心繼續唱落去，唯一自己見到愛我嘅人會比較眼淺。」張偉文堅持唔會同觀眾分享死過翻生經歷，因為唔想記住。
另外，表演嘉賓姚煒就話新生代歌星唱得好好，舊一代都冇得彈，所以冇打算復出唱歌，反而會有啲戲癮，但傳道使命更大。之前姚煒姐不在港，未有時間問候林青霞，她說：「佢喺香港另有居所嘅。」

完騷後，張偉文被過百鐵粉包圍要求「集郵」。
完騷後，張偉文被過百鐵粉包圍要求「集郵」。
夏蕙BB完騷後又再現身，踩場大派自己嘅Farewell Party海報。
夏蕙BB完騷後又再現身，踩場大派自己嘅Farewell Party海報。

 

姚煒未有時間搵林青霞。
姚煒未有時間搵林青霞。

星島新聞集團慶回歸25周年專題網站，請即瀏覽

立即下載 | 全新《星島頭條》APP : https://bit.ly/3yLrgYZ