近日獲頒金紫荊星章的汪明荃（阿姐）今晚出席「八和粵劇學院課程匯報演出」，阿姐表示很開心政府能看到她做的事情，對她來說也是一種鼓勵，但笑言家英哥沒有表示，希望等疫情好轉後可相約朋友吃飯慶祝。
提到MIRROR演唱會日前發生嚴重意外，曾觀看頭場的阿姐表示當日也覺得舞台危險：「條橋好似唔穩陣，同埋Anson Lo幾個動作、向後倒，其實都好危險。我哋做大戲都有做，但個底就會舖好多榻榻米，佢哋好似冇。」阿姐希望受傷的舞蹈員能大步檻過：「咁年輕，又靚仔，佢跳得幾好，希望佢冇事，我睇完出事條片，揸車一直喺度震。」阿姐又指MIRROR是當紅團體，演唱會不需要太多機關：「大場都未上過，冇咁多經驗，做一個四面台係唔簡單，藝人要顧好多嘢，佢哋人已經多，dancers又多，根本唔夠位跳，啲位太迫、機關太多，佢哋排練時間又少，一下子上台要記咁多，但又唔熟個台就好容易行錯，其實佢哋個show係未ready，不過嗰日我都睇得開心，佢哋好年輕，好有才華。」
提到當年林子祥為她擔任演唱會表演嘉賓時發生意外，阿姐説：「當時觀眾好興奮，佢戴咗耳機聽唔到，一直向後退跌咗落去。」問到阿姐以後開紅館騷會否擔心安全問題？她表示不會：「自己知道要檢查，每個部門都要做好自己嘅準備，同埋真係要排多少少，佢哋12人走位多好多，出出入入又好多，冇經驗嘅人做四面台係唔容易，要用多啲功夫，顧唔到咁多，在台上會興奮，啲機關唔應該咁樣。（作為前輩如何鼓勵他們？）最緊要小心，唔只藝人，最重要主辦機構，一定要負責，搞到咁大件事，未試過！」
問到阿姐有否聯絡Edan（呂爵安）？她透露家英哥有，自己就有問候ViuTV高層金廣誠，不過可能對方忙於善後未有回覆。談到粵劇演出的安全問題，阿姐表示每方面都很嚴格：「搭超過三呎佈景都買保險，亦冇咁多機關，上次家英哥演《英雄叛國》喺三呎台打筋斗跳落嚟，第一場後覺得太危險，就取消咗。」
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
