岑珈其和同門師弟張進翹（mansonvibes），最近齊為動畫電影《DC超寵聯盟》配音，兩人自小都是動畫迷，一直都有幻想可以參與，今次有機會兩人都表現得相當興奮。而已為人父的珈其，雖然囝囝彥臻只得一歲多未識睇戲，但他希望多參與配音，將來可以同囝囝一齊欣賞。 採訪：杜杜 攝影：Stanley
珈其和mansonvibes得知有機會配音時，極度興奮，珈其說，「細個成日都幻想，如果將來有得試吓配音就好，仲要係配卡通片。」開心的mansonvibes更有誇張舉動，「即刻拎住份稿，全部角色試咗一次，雖然未知自己係咩角色。」作為爸爸的珈其，已幻想第時同囝囝臻臻一齊睇，「如果佢睇卡通片又聽到爸爸把聲，我覺得係件好開心嘅事，所以我嗰時一知道好開心好興奮。」
瞬間轉移去旅行
戲中珈其聲演識得發閃光的松鼠「阿哨」，而mansonvibes則為會噴出冷風的天竺鼠「基夫」配音，不過如果可以真的有超能力，兩人都不希望是這兩種，mansonvibes更搞笑話，「我怕凍，如果再結冰就大鑊！」珈其話最想識得瞬間轉移，「我哋做嘢好忙，好想忙裏偷閒去吓旅行，如果一閃可以去咗日本幾開心，一閃就可以返咗屋企瞓，一閃又開工，哈哈！」提醒他這個超能力要一家大細有先得，否則只有他單拖去旅行，他聽到後即時話要諗諗，見到師兄咁苦惱，mansonvibes馬上出手，「咁我嘅超能力係讓人可以同人一齊有超能力啦！」被珈其大讚夠大愛。
配音過程有一定難度，但珈其和mansonvibes都好希望繼續有機會再配動畫片，「我最大嘅成功感係我囝囝睇，私心想配咗卡通片先。」而mansonvibes認為配動畫片可以天馬行空特別好玩，而他最希望配些類型宮崎駿的作品，「嗰啲卡通片嘅人啲聲好好聽，佢哋講廣東話嘅方法冇咩唔同，但係會夢幻啲。」
星島新聞集團慶回歸25周年專題網站，請即瀏覽
立即下載 | 全新《星島頭條》APP https://bit.ly/3yLrgYZ
