黎諾懿於疫境下事業有大突破，除變身「疫境廚神」主持飲食節目《滿足的味道》外，仲做埋飲食集團創意大使，今年繼續推出慈善月餅。黎諾懿除咗忙工作同照顧妻兒，一有時間就會湊埋鄭伊健去玩。黎諾懿爆料指阿Yo(蒙嘉慧)喺日本讀緊書，短期內唔會返嚟：「伊健可能怕悶，𠵱家喺香港玩水都唔過去。」。採訪：方騫平 攝影：鄧國良 場地：Maison Gaia
黎諾懿主持6集的TVB飲食節目《滿足的味道》，介紹香港美食如燒肉、雲吞麵、煲仔飯及燒賣等，更會探討食物背後的故事及情懷等，片頭曲更邀得金像級日籍音樂人波多野裕介作曲，雖然節目拍到超晒支，但仍獲總經理曾志偉力撐，令他相當有滿足感。「疫境廚神」成為黎諾懿的Icon，不過他無意開餐廳：「唔少人搵過我合資，但唔係咁簡單，除咗要承擔風險，仲要對食客有責任，拍嘢容易分心，而且我對水準咁執著，咁嘅經營模式好快會執笠！都係做住飲食集團創意大使先，今年我會繼續推出慈善月餅，將收益捐畀低收入家庭、盲人輔導會等。」
指伊健擔屎唔偷食
提到老友蒙嘉慧去年與老公鄭伊健移居到日本福岡，鄭太更獲老公打本7位數於當地開設房地產公司。而每年中秋節，黎諾懿一定約埋鄭伊健一家食月餅賞月。今年黎諾懿會額外向造餅師傅，「柯打」一個20黃巨型月餅自用，更預告將會同「一枝公」嘅伊健共渡佳節：「阿Yo今年中秋唔會返嚟，因為佢喺當地讀緊兩個課程，其中一個係日文。𠵱家伊健喺香港成日同我玩水上活動，我哋學緊啲新嘢，玩衝浪風帆。」
笑他湊住寂寞「人夫」，諾懿即說：「唔好咁講，佢『湊』住我畀空間我出去偷懶啫！伊健出名穩陣到『擔屎都唔偷食』，同佢一齊老婆一定唔擔心，反而覺得由佢𥄫返住我。」至於點解伊健唔「返鄉下」慰妻呢？黎諾懿就作出分析：「可能佢覺得冇我哋陪佢玩水怕悶，而老婆返港又要隔離咁麻煩就算把啦。其實我都贊成小別勝新婚，咁樣反而變返有愛情驚喜。」
稱高海寧冇新戀情
至於35歲高海寧（高Ling）最近喺社交網晒甜蜜留言，疑似出現新戀情，黎諾懿就叫大家唔好諗太多：「日前先同佢食過飯，以我哋嘅關係，佢有會同我講，我仲乜同佢隱瞞？佢一直想有個家，佢有我會戥佢開心。」黎諾懿又感恩有個好老婆李潔瑩，令42歲的他可以專心工作：「我同老婆好少嘈交，但最近佢發長文忟我教壞個仔(小春雞)，因為我成日用輕鬆方式話個仔『老表！好快手啲嗱喎！』搞到個仔咁嘅態度對住老師，老師要見家長反映，我唯有同老婆講『小朋友慢慢教！』點知老婆忟爆回應『係要教好你呀！個仔學晒你啲嘢。』」
立即下載 | 全新《星島頭條》APP : https://bit.ly/3yLrgYZ
