防彈V Jennie再洩錫額頭拍拖照爆料者上載合照資料夾明示仲有大把

紅遍全球的韓團防彈少年團(BTS)的金泰亨(V仔)及BLACKPINK成員金珍妮(Jennie)，自今年5月被遊客偷拍秘遊濟州後，即瘋傳熱戀，雙方Fans左搵右搵證據喊晒話P圖，而雙方公司對旗下藝人有緋聞一向火速否認，但呢對冇囉。

五月被網友偷拍秘遊濟州。

當Fans一廂情願覺得偶像為咗佢哋唔會拍拖，自我沉醉秘遊照係P圖後，上月尾，有一張V仔在化妝室整頭照片流出，相中更見到Jennie在V仔身後拎手機拍住V仔，而V仔更展現怕羞笑容。全球ARMY(BTS Fans暱稱)繼續認為是合成圖片，更放大圖片分析光暗位，相當好笑。

Jennie喺化妝室影V仔，睇男方笑得幾甜。

因為Fans嘅質疑，激發起爆料者愈爆愈多，之後分別流出V仔及Jennie着情侶裝在V仔豪宅等電梯自拍照，及著情侶維尼Tee在電梯內自拍照，可見全部相都出自Jennie手機。

V仔豪宅等電梯自拍。

著情侶維尼電梯自拍。

雖然爆料人的Twitter被Block，但佢再開TG Group，更事先張揚有大量VJ戀蜜照，仲問Fans想睇邊類型嘅相，當中提到有親吻相，更答Fans是錫額頭照，然後仲招積表示翌日會上載新相，不過第二晚，爆料人話收到好多重要人物電話，所以唔會再發放新相，並強調所上載嘅相完全無執過，但話口未完，尋晚又有新相流出，當中有Jennie被男子親吻額頭照片，當時女方更展露怕醜笑容，而男子就只見鼻下位置，另一張就是V在豪宅睡房跟一名長髮女子的視像通話截圖，同樣女子只見到鼻至下巴位置，還有Jennie跟一名男性的拖手照，但男方只見手，加上有BLACKPINK成員的紐約合照，加上合照資料夾，將圖片放大可見當中有四張未曾曝光的合照及已曝光的兩張合照，明顯所有拍拖照均由同一個爆料者發放及肯定從Jennie的電話流出，而據爆料人叫網民多聽BLACKPINK新歌，估計是BP私生飯所為。