41歲的袁偉豪（Benjamin），07年奪得「香港先生」冠軍加入無綫，話咁快15年。因為老婆張寶兒開IG直播，身在酒店隔離檢疫的袁偉豪忽然亂入，更盡訴心中情，自爆今年初因拍劇壓力大致脫髮，但直播期間有網民踩佢又老又殘，愛夫心切的袁太即出口維護。
人嚟嘅，當然會老，Ben早在16歲參加雜誌的校花校草選舉入行，之後更拍過多部電影，可惜佢唔識珍惜，加上處於尷尬年齡，令機會愈來愈少，期間更一度離開娛樂圈，最終佢痛定思痛，認定最愛係幕前演出，然後再次喺圈中發力，擔任多部劇集嘅男主角，拎過最受歡迎電視男角色，及多次提名爭視帝。《頭條娛樂》記者問Ben拎咗一堆珍貴3R鮮肉照，有BB相有少年相，仲有好多拍戲嘅花絮相，後生嗰陣嘅袁偉豪都真係幾男神㗎。
TEXT:TOTO、SW
阿Ben小時候跟婆婆一齊住，在六個阿姨及舅父陪玩下，激發他的表演潛能，「佢哋成日叫我表演歌舞，又幫我扮女仔，用花生當耳環。」
97年阿Ben參加校花校草選舉奪冠後，先當模特兒，後來再簽經理人公司力圖，「嗰陣時得17歲，以為自己好紅，真係幾囂㗎！」
剛入行的阿Ben，仍是新法書院F.4學生，最愛打籃球的他，更是校隊成員，「嗰陣時眼大大又面圓圓，係咪似女仔多啲呢？」
98年阿Ben接拍電影《新古惑仔之少年激鬥篇》，找不到飾演林曉峰少年版的演員，「我見中學同學余嘉豪好似，咪介紹佢參演。」
阿Ben首次接拍電影《新古惑仔之少年激鬥篇》，還有機會到澳門拍外景，「嗰陣同霆鋒佢哋個個都係後生仔，所以玩得特別開心。」
熱愛音樂的阿Ben，01年跟柯有倫（小黑兒子）、陳國坤（小龍）等合組樂隊「Poet」，「大家夾咗兩、三年，參加過內地同台灣啲Band騷，後嚟各有各忙先解散，依家大家仲有成日聯絡！」
阿Ben介紹了同學余嘉豪入行後，兩人經常合作，2000年兩人再度參與《不死情謎》，「呢套係最後入部，之後佢退出幕前專心讀書。」
阿Ben入行15年來，最感激就是恩師劉偉強導演，「導演真係畀咗好多機會我，亦教咗我好多做人道理，可惜我當時未識得珍惜。」
99年阿Ben參與電影《烈火戰車之極速傳說》，首度跟譚耀文和陳豪合作，「我喺TVB撞返陳豪，佢都唔記得，可能我真係大個咗。」
立即下載 | 全新《星島頭條》APP : https://bit.ly/3yLrgYZ
