不少人會選擇購買冷凍食材放入雪櫃備用，有網民於社交平台發文指，日前於牛池灣一間連鎖雜貨店購入兩盒急凍薄餅，豈料回家拆開包裝後，驚見其中一盒薄餅嚴重發霉、呈灰黑色，引起一眾網民熱議。
該名網民於facebook群組發文指，近日於牛池灣一間連鎖雜貨店購入兩盒急凍薄餅，回家打開包裝後才發現其中一盒薄餅嚴重發霉至灰黑色，疑不斷經解凍後再冷藏導致發霉，樓主不滿直言，「咁都賣得畀人？」。
急凍薄餅嚴重發霉、呈灰黑色。FB圖片
樓主透露，購買薄餅時已發現店內的雪櫃疑似故障，「成地水，無放嘢，啲pizza似臨時放住喺另一個雪櫃」，形容薄餅盒身已皺皮，惟店員強調是當日新鮮到貨，豈料購買後才驚悉「中伏」，故發文提醒一眾街坊要留意該店的食物安全問題，「其他冷藏食物都可能放咗室温一段時間，發霉發成咁唔係一時三刻」。
一名街坊於牛池灣雜貨店購急凍薄餅後，發現竟嚴重發霉。FB圖片
帖文引起網民熱論，有網民認為店家未必知道貨物已發霉，籲樓主應該立即退貨，「有個紙盒封住，店員未必會知道食物已經變壞」、「個盒密封、又無過期嘅話，真係唔知有冇發霉嘅，最緊要佢肯退貨」；有網民則笑言，「睇落以為係普洱茶餅」！
資料來源：黃大仙區友(黃大仙，新蒲崗，鑽石山，慈雲山......)
