MIRROR7月時舉行紅館演唱會，不幸於7月28日第四場時發生嚴重意外，而至今仍在深切治療部留醫的舞蹈員李啟言（阿Mo），近日情況由危殆轉為嚴重，李父李盛林牧師日前發代禱信指阿Mo有95%不能復原，盼查明真相。不過事發至今已近一個半月，仍未有單位承擔責任，多日來被網民怒轟「龜縮」。
曾參與《全民造星》的著名排舞師鄧駿銘（Zero）較早前在社交網發長文，點名炮轟三個主辦單位：「每次出嚟嘅聲明都係避重就輕，未有正面交待過任何有關意外原因、賠償方式、勞工保障等問題。調查咗咁耐，除咗『金屬疲勞』之外亦都冇任何嘅結果。」
Zero隨後轉為怒斥演員會的舞蹈總監，他根據MakerVille於8月12日發出的聲明內容，認為舞蹈員是直屬舞蹈室，而直屬舞蹈室老闆就是舞蹈總監，即是判頭。Zero指總監有義務保障舞蹈員，然而該總監並無參與23位舞蹈員於7月31日的聯合聲明，只相隔數天後僅出一個Ig story就當作是交代。Zero勸舞蹈總監「唔好再匿埋」，並提出三點要求對方交待。
「1. 既然喺阿Mo出意外前，已經發生至少三次意外，亦有另外一位dancer（舞蹈員）因為咁而送院，喺職責上面你有冇作出跟進？有冇同主辦方解釋過舞台嘅危險性並作出risk assessment（風險評估）？主辦係咪清楚知道dancers面對緊嘅風險？
2. 意外發生之後，你本人實質做咗啲咩去維護你下屬嘅權益？呢個半月你究竟係點樣去同主辦方跟進，同協助受傷及受困擾嘅下屬爭取應得嘅賠償？
3. 作為dancers嘅領班，今次意外究竟個責任係邊一方？今次事件之後，你會如何防止下次你再擔任同樣職位時，再發生同類事件？」
Rock Sir成矛頭
怒火難平的Zero續指，今次事件對整個行業是一個嚴重打擊，直接影響行業生態，希望該總監「坐得呢個位就要負責返應有嘅職責同道義」，發生意外後，就要向負責後續事宜，並向公眾解釋，而非「不停搬啲重複又重複嘅聲明出嚟」。
雖然Zero並無在長文點名誰是今次MIRROR演唱會的舞蹈總監，但有網民在下面留言tag與MIRROR合作無間的排舞師方家諾（Rock Sir）。意外發生後四日，Rock Sir才首度回應事件，曾在Ig story貼文：「舞台意外發生後，心情極為沉痛、難過。作為MIRROR演唱會的舞蹈總監，我在此向參與是次演出的全體24位舞蹈員致以深切慰問。感謝各界在苦難時與大家一起渡過。願阿Mo，阿峯及Zisac能早日康復，亦祝是次有份參與的舞蹈員、MIRROR成員、花姐及相關人士保重身體。祝平安。」
立即下載｜全新《星島頭條》APP：https://bit.ly/3yLrgYZ
星島頭條App 經已推出最新版本，請立即更新瀏覽更精彩內容。
