67歲的蘇施黃曾於2005年患乳癌，戰勝癌魔後如常工作食好嘢，3年前離開商台轉做「SOL（Star Opinion Leaders）」，開 YouTube 頻道「教煮蘇 This is So good」分享食買玩。
TEXT:星島頭條娛樂組
日前，阿蘇上載醫院自拍的新片「照腸結果出咗啦！」親揭患了大腸癌第三期。阿蘇透露上月26日入院做檢查，照心照肺照胃照腸，發現罹患大腸癌後即接受手術，住了8日醫院，於出院前一日拍片輕鬆講述情況，並預備接受化療，積極抗癌。
她說:「星期一入院照心，照肺，星期二照腸照胃，瞓咗8日醫院，因為痾血照腸，好似痔瘡咁，痾三幾日又停，停咗個幾月又痾鮮血，痔瘡會痛，我又唔係痛，咁唔痛，會係乜呢?醫生話穩陣啲，照吓好，我父親都患過大腸癌，報告出咗，係腸癌，拎啲嘢去驗，夜晚就知，出報告要切割。」
「星期三切割咗腸，大腸轉角位切咗15cm，嗰度有個腫瘤，側邊攞咗25粒 淋巴，其中3粒有感染，醫生晨早已經話肯定唔係第一期，驗出嚟係大腸癌第三期，佢話穩陣啲，做完手術後再做一個PET Scan(編按:正電子掃描(Positron Emission Tomography，簡稱PET Scan)檢查，睇吓有冇走去身體其他地方，骨或胸。」
報告出咗無擴散，阿蘇舉晒V字超開心「噚日臨出院做檢查，結果冇擴散，而家係大腸癌第三期，已經切咗，做完手術嗰日瘟瘟沌沌，但精神，吊咗兩日鹽水，第二日已經要求落床，第三日要求唔要吊鹽水，我好鍾意食嘢，拔晒啲尿喉，通大腸嘅喉，鹽水喉，可以食啲Soft Meal，自己喺病房行來行去，行一陣發現房太細，唔夠喉行出走廊，特登用手擺腰後面，挺直啲行，傷口因為微創，好似一個五筒咁，喺個肚臍側邊開咗4個窿，放啲內窺鏡入去，郁來郁去唔係好痛，非常感謝醫生同護士護理人員，包括同我抺身，照顧飲食，另外要超讚醫院啲飲食。」
好鍾意食的阿蘇愈講愈興奮，「大家點解覺得自己病?我好怕飲滾水，成日覺得病人先會飲滾水，由細到大都係咁講，有啲食物病人先會食，所有醫院嘅食物都相當難食。」阿蘇仲PO咗好多醫院食物出嚟，包括蝦球炒貴刁、燒腩仔、點心同黑椒豬扒意粉等等，賣相相當吸引，難怪佢Send畀朋友睇，朋友都以為我佢出咗院。
雖然做完手術，但阿蘇仍中氣十足，仲有感而發教大家點做一個正能量嘅病人。「一個人當你食嘢覺得自己病就好病，但當食嘢覺得同NORMAL人一樣就一樣，我開咗刀，咁大個症，仍然笑口噬噬，面色非常之好，最緊要心境開朗，全靠食物。我而家仲有大考驗，因為仲要做化療，唔緊要，化療完又擦過，朋友話化療前先吃為敬，化療後再吃為敬。」好多網民讚阿蘇開朗豁達全身正能量，又留言祝福阿蘇早日康復。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
