可以聘請到一個自己滿意的外傭並不容易。有港爸在網上發文，分享指家中的印傭最初由「一張白紙」開始，直到現時「全部自動波一腳踢」，而且任勞任怨，直言「感恩最近簽咗第三張約，姐姐做咗咁耐都無跌watt」，令網民甚為羨慕。
該名港爸昨日(11日)在facebook群組「表揚好姐姐開心分享區」發文，提到家中有6個人包括小朋友及長者，並指印傭21歲時來港工作，當時「一張白紙咁教」。他指，在首2至3個月要與她一同煮食，隨後讓她慢慢嘗試，幸好她算聰明，只需教導1、2次已學會，「同埋佢會問問題，點解要咁樣、點解要落呢個之類，我整乜嘢新嘢佢都會企喺度學」。他又提到，印傭「仲好young！難得佢唔貪玩，呢兩年covid佢放假都習慣少出街，就算去都係幾個鐘就返屋企」，並直言「真係畀啲耐心，我基本上無罵過姐姐，我始終都信你對人好人對你好」。他亦指，「姐姐煮飯都會諗老人家有啲唔食得，有時中午飯仲要分開煮，因為要夾兩個仔放學時間唔一樣，老人家又要食先，我都佩服佢」。
該名港爸續指，「由乜都唔識煮唔識做，到呢家每日神早起身照顧小朋友返學、打掃買餸煮三餐飯、全部自動波一腳踢，任勞任怨」，並指「感恩最近簽左第三張約，姐姐做咗咁耐都無跌watt，仍然用心煮新菜式」，而且「感恩..續約都完全無扭過計」。港爸又笑言，太太在印傭的協助下可以休息，並指「我兩個仔朝早返學全部姐姐搞掂，阿媽夠膽死9點幾先起身，啲仔已經出晒門口，姐姐都打掃咗一朝了」。
相關帖文隨即引起熱議，並有不少市民甚為羨慕。有人直言，「你姐姐好勁，又有天份又有心機」、「睇啲餸菜就知姐姐有耐性、肯學、用心做…… 心心眼」、「羨慕死，我嗰個有一半識自動波打掃就好」、「姐姐好有心」、「屋企有個咁嘅姐姐幫我手，我一定好開心」、「你真幸福，遇到咁好嘅姐姐」、「真係值得讚揚」、「別人的姐姐總是不會令人失望」、「羨慕死隔離呀」等。
另有網民則分享家中外傭的情況，並指「我嗰個由白紙入屋，到依家3年都好似白紙咁，保持住」、「我嗰個入屋39，做咗就嚟7年，愈做愈差」、「我新姐姐入屋1個月 都係21歲，仲調節緊… 我見佢好鐘(鍾)意玩直播，連炒個菜都直播」、「請教下如果寫埋菜單同食譜畀姐姐，都成日睇漏睇錯，落錯野，已經差唔多兩年日日都係咁係咪冇得救」等。
帖文來源：「表揚好姐姐開心分享區」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgY
