卡塔爾由西班牙藉教練菲歷士山齊士執教。Reuters

大家好！四年一度世界盃又到啦！寫開賽馬分析的艾爾平時都有睇波（利申我係車迷），今次就「踩過界」，會於世界盃期間講下賽事分析，仲會提供投注心水。艾爾今屆比較鍾意荷蘭隊，之後再講下點解！ 

今屆世界盃於爭議聲中如期舉行，打頭陣就係東道主卡塔爾對南美洲代表厄瓜多爾。2019年亞洲盃冠軍卡塔爾，今屆首度打入世界盃決賽周。於西班牙籍教練菲歷士山齊士執教下，卡塔爾擅長排五後衞打防反戰術，大家可以留意前鋒艾莫爾斯阿里同翼鋒阿克林阿費夫，兩位都屬於速度型嘅球員，並且曾經於西班牙短暫外流過。 

至於厄瓜多爾可以話係決賽周常客之一，今屆大軍名單中，當然要留意踢緊英超白禮頓嘅中場摩斯卡些度同左閘艾斯度比恩，國家隊入球紀錄保持者安拿華倫西亞，都可能令卡塔爾後防遇到麻煩。不過睇番今屆南美洲入圍球隊之中，厄瓜多爾可以話係火力最弱，近八仗賽事只入四球，當中有六場賽事保持不失，睇到呢隊波攻弱守強得好明顯。 

卡塔爾近八仗主場賽事六勝一和，睇落好似好硬淨，但其中五場對手只係對住中東國家球隊，上仗對斯洛文尼亞都只能和波。縱使今次有地利，但對手厄瓜多爾防守能力同用波能力都較強，主隊要入波相信唔太容易。考慮到兩邊打法比較保守，今場入波應該唔會多，艾爾先推介入球大細二點五細同半場和，可以考慮下！ 

最後呼籲，星期一晚觀塘投注站會有《猜波台》直播活動，艾爾都會到現場睇波，希望到時見到你啦！艾爾

立即下載 | 全新《星島頭條》APP : https://bit.ly/3yLrgYZ