《過時·過節》已上映第二週,累積票房快接近800萬。戲中飾演不孝子的Edan昨日現身九龍及新界五間戲院,連踩18場謝票答謝粉絲支持,而同場更有Edan的角色原型即導演曾慶宏,兩個「阿陽」同場,現場氣氛相當熱鬧。
雖然每場謝票場時間有限,不過Edan都盡量回答粉絲的提問,也透露了不少自己的心底話,問到《過》片對他的影響,他表示:「其實自己對演戲一直有一種迷惘,唔係好知道點樣為之好同唔好,尤其今次係比較正劇嘅處理,同大家睇過嘅《大叔的愛》截然不同,所以今次好幸運遇到導演Eric、毛姐同君豪哥呢班前輩,同我傾好多計,不停調整我,令我有好多得著,包括明白多咗演戲係點嘅一回事,更加深入了解導演想帶出嘅message。」
電影中一眾角色因溝通不善而結下難解的結,Edan坦認自己亦不懂處理:「我都唔係同屋企人有好多溝通,似我家姐談善言戲中角色阿琪咁,唔係好出聲,由細到大好少同屋企人講心事。不過親身經歷呢部戲,我都有學習同屋企人多啲溝通,珍惜好緊要,所以呢部電影對我嘅意義已經超越一部作品,對人生有一定影響。加上我仲係好需要阿媽嘅照顧,所以唔會好似導演咁離家出走,哈哈!」而身旁的導演曾慶宏也打趣回應:「放心,我而家有同屋企人見面及食飯嘅!」
不少粉絲問到戲中Edan與Anson Lo的關係,Edan回應說:「係好朋友嘅關係囉,不過喺電影時空就未必會帶雀仔返屋企食飯,因為要帶咗我阿爸君豪哥返去齊齊整整食餐飯先!」Edan由下午跑戲院到晩上,保持精靈活潑的狀態,因為見粉絲相當熱情的歡呼和鼓勵,一向寵粉的Edan亦清唱幾句電影主題曲《攀上天梯的螞蟻》,粉絲亦一齊大合唱。Edan早前於IG Live透露稍後會再抽時間到戲院謝票,大家密切留意電影公司的公佈。
《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ