有網民去飲茶點自選午市套餐，心血來潮計算價錢時發現原來散叫更便宜，於是在facebook專頁「中伏飲食報料區」上載菜單發帖呻笨。
一心以為套餐扺些的樓主指，午餐點了價值268元的套餐，「臨找數心血來潮加下啲價錢，發覺散叫只需239.6元」，於是向侍應查詢，卻得來「套餐係貴啲」的回答，並指「冇辦法，不可void單打散再入，公司會以為自己落格」，最終經交涉後免了2位茶錢。
應回的網民反應兩極，力撐樓主的認為「套餐一般都會經濟啲」，有人卻反指「無話套餐一定平過散叫」，還批評樓主落單前無先格價，且消受了酒樓的免茶錢補償便不應再在網上申訴。
點心紙及網民回應請點擊組圖瀏覽：
有網民細讀菜單後回應指，如果樓主「兩個點心係揀咗大點，會唔會價錢差唔多？我見套餐乜個蒜香蒸排骨係大點，始終酒樓set套餐價實係拉上補下」，並提點「散叫同套餐，梗有一平一貴，就係吸引你叫唧，我都會計點叫抵啲先叫㗎」。
樓主上載附價錢的點心紙，並按指導再計算後發現「即使改叫兩個大點都是平過套餐價，下次不叫套餐就是了」，「改兩個大點，都只是245.6元，仍然是散叫平啲」。
另有網友提醒「套餐一向都係劏水魚」、「好多時套餐都係搵笨，搏你唔計，好似街市買嘢咁，菜心10蚊斤，兩斤25蚊咁」、「無話套餐一定平過散叫，如果選擇困難嘅人，只係喺套餐入面揀，困難會細啲」、「套餐係平啲只不過係一廂情願諗法」、「幫你揀埋唔洗攞計數機計已經係服務嘅一種」、「只係方便啲，唔駛揀」、「套餐平過散叫係先入為主吧！以前我都係咁諗，試過唔係之後，很少叫套餐了。除非人多而套餐內組合又滿足各人口味，不用煩才叫套餐」，而且「佢都冇話係特價自選午餐，冇平都好正常」。有人更科學地列出方程式：「套餐 = 慳咗睇成個餐牌嘅時間，時間＝金錢，結論＝套餐會貴過散叫」。
另有網民力撐樓主，指「第一次聽…散叫平過套餐…」、「我撐樓主，套餐一般都會經濟啲，貴咗唔係好合理。套餐啲材料餐廳可以預備多啲、有啲嘢可以整定，所以會經濟啲吸引啲客叫。有時係促銷貴食材的策略」、「正常係套餐會平啲，夾咗啲無人會叫嘅一齊，今次擺明係酒樓搵笨，搏客人懶得諗食咩，又唔去計下散叫係幾錢」。
相關新聞：
Juicy叮｜港媽呻三家人去飲茶為一壺茶鬧交 反被批唔識做人：https://bit.ly/3i3IAoe
Juicy叮｜4個人食放題叫60碟點心惹議 網民：「人出點心你出命」：https://bit.ly/3IfN4mk
Juicy叮｜小西灣古惑酒樓冒茶客筆跡剔點心 網民一招智破呃錢技倆：https://bit.ly/3WZqyCC
網民提醒江湖險惡
有網民則安慰「幾十蚊當買個教訓，下次就會醒目」、「始終要睇清楚，江湖險惡」，並都多謝樓主「提醒多啲人知」。另有心水清的網民計算到，樓主「叫了龍躉蒸飯就30元差價，但若叫了星洲炒米就是70元差價了」、「如果你揀星洲炒米，仲蝕多40元添，自選套餐係咁架啦。有平嘢有貴嘢」。
經過網友的詳細講解，樓主明白經一事長一智，「以後自己會計吓先喇」，但強調事件「是顛覆了我對套餐的思維」。
另有網則斟酌侍應的「套餐係貴啲」回應，指「如果侍應醒目嘅話會講套餐份量多啲」、「如果我係經理會答你套餐同散叫份量唔同」、「套餐上菜時間快啲」等。
帖文來源：中伏飲食報料區
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
