娛樂圈特別多渣男蕩女,但好男人好老竇好彩都仲有,張學友都可以說位列三甲。好男人形象非常貫徹,出道緋聞幾乎零,學友是羅美薇(MayMay)的初戀,雖然話初戀多數不得善終,但拍拖多年無風無浪,到96年二人順理成章拉埋天窗,成為當時佳話,良緣天定,婚後學友顧家搵食之責一人揹起,MayMay就安心照顧家庭做全職主婦。
除了好老公更是好老竇,自從大女瑤華01年出世後,學友已經減少幕前演出,4年後迎來幼女瑤萱,學友索性將所有工作都推晒,有幾年直情無晒影,唔講以為佢提早退休。
![學友一向係圈中廿四孝老竇。](https://image.hkhl.hk/f/1024p0/0x0/100/none/7fc706859e0e9390526ed8f3a13ac1e0/2023-01/wttp000p08a.jpg)
點解學友要半退休,原來係為了專心湊女,原因唔係請唔起工人,只係佢唔想錯過咗兩個女成長期,怕將來就後悔莫及追唔番,兩個女喺香港讀書,學友日日做柴可夫,送返學接放學,全程自己跟到足,咁多年好少見老婆蹤影,係因爲做咗張太後,MayMay真係唔想再喺閃光燈下出現,每次送女阿媽都將自己收埋,拉晒窗簾。
七人車後面,兩公婆夾到絕,非常成功避開傳媒視線,後來夫婦二人決定送兩個女去英國寄宿,學友呢位視兩個女係前世情人嘅絕種好爸,每個星期都會飛一次倫敦,仲要係民航機,舟車勞動,等兩個女知道老竇任何時候都stand by照顧佢哋,如是者學友一年搭幾十次長途機,諗起可以見到兩個心肝寶貝,完全唔當苦差,非常自得其樂,所以嗰幾年學友忙到癲,係因為個個星期要飛。
後來兩個女兒唔適應外國生活,學友第一時間接兩位千金回港,繼續日日做柴可夫,接送阿女出入。所以瑤華瑤萱兩姊妹同老竇感情好到不得了。身邊朋友成日笑學友,因為兩個女跟老婆餅印般,尤其大女瑤華,學友一定係超級愛MayMay,三個女人已經繫佢一生。
【其他文章】:
李嘉欣17年前談劉鑾雄片翻Hit 稱輾轉得知舊愛登報賀生日:鼓勵佢同傳媒講
劉鑾雄記者會自爆遭前女友冒簽申請油卡 姊妹花詐騙持續年半總金額逾20萬
李嘉欣激罕晒7人家庭大合照勁風騷 60歳胞姊李嘉明靚爆近況曝光
《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ