楊明前年8月在半山馬己仙峽道駕駛失事撞壆，官司擾攘逾兩年，於去年12月底冬至當日遭法官駁回上訴，即時入獄18日兼停牌兩年。楊明今日刑滿出獄。經過兩段公開道歉悔過訪問之後，楊明再度接受《娛樂新聞台》訪問，片段中楊明更數度落淚，亦有分享自己的獄中生活和解答因為自身安全而轉倉的疑題。
【相關閱讀】：
點擊睇楊明今日的出獄及回TVB公司受訪的過程：
楊明一開始接受訪問時已經眼濕濕表示：「係呀，呢件事我都經歷咗好耐，啱啱經歷埋18日，其實我喺入面諗咗好多嘢，因為好多時間畀我自己靜下來反省。我覺得我應該要成長，同埋我有好多嘢都做得不足，咁希望出返嚟嘅時間，可以做返一啲彌補嘅嘢，同埋一啲幫助人嘅嘢。（會唔會覺得呢18日對你嚟講係好重要嘅一段時間？）其實喺入面頭嗰幾日係諗唔到嘢住，因為係一個好陌生嘅地方，同埋只係一個好狹窄嘅空間，咁一路都喺度恐懼呀，自責呀，其他嘢都喺個腦海入面浮現。之後過咗幾日就開始定返落嚟，開始可以自己諗返多啲，思考多啲嘢。同埋我喺入面都睇咗好多書，可以幫助我喺人生入面點樣行返條正路，點樣可以返個有用嘅人。」
「其實呢18日入面，對我人生係一個好重要嘅時間，同埋轉捩點，一定有啲得著，同埋成長咗好多。（其實你最自責嘅係咩嘢？）我最自責嘅係，我而家咁大個人，都做一啲事出嚟，令到一啲關心我嘅人、屋企人去極度擔心。我最慚愧嘅係我嗲哋媽咪，令到佢哋兩個老人家咁老都要擔心我，呢個係我喺入面自責得自己最辛苦嘅一樣。」
「（呢啲嘢令到你都喊咗好多次？）係呀，入面因為好多自己不明朗嘅事情都會發生，因為係一個好陌生嘅經驗，咁恐懼，每個鍾都纏擾我。（係邊一方面嘅恐懼？）入面係我未接觸過嘅，每個程序我都未真實了解過，所以一分鐘接落嚟嘅情況都唔知，所以一路都好恐懼。同埋出面嘅輿論我喺入面係唔知嘅，喺唔知嘅情況下一路無限放大，無限去攻擊自己，對於呢幾樣嘢係覺得好恐懼。」
「（女朋友同家人將愛帶畀你？）我喺入面係自己一個承受我嘅空虛寂寞同埋自責，但佢哋，尤其係思明啦，佢要面對一啲輿論、記者，面對晒應該我要處理嘅嘢，佢一直喺出面都好辛苦咁幫我處理。同埋我父母都要受一啲唔好嘅批評。佢哋要承受嘅，喺我嘅自責入面個份量係最重。我都想喺度多謝佢哋。」問到可有方法與他接觸？楊明表示有探訪，可以書信，他們知道楊明在入面會好驚，所以每次見面都一直支持及給予親切嘅笑容，「但我見到佢哋係擔心嘅，但佢哋極力表現叫我唔使擔心。」及後楊明一度哽咽，不忍落淚要用紙巾抹眼。
問到未來工作方面，楊明表示自己在18日的窂中生活亦有反思：「出嚟之後嘅生活，都有好多擔憂。其實好多謝公司，喺入到去嘅第二人，思明已經同我講公司對我嘅關心，對我嘅支持同埋所有資源。所以我喺入面雖然好多嘢諗，好多唔同事情攻擊自己，但都有一個好大嘅鼓勵同鼓舞，所以都好衷心咁多謝公司。由我由細到大，做錯咗咁多嘢，公司都對我不離不棄，多謝。」
提到獄中的生活，楊明透露謂：「開頭兩、三日，因為我喺隔離中，所以甚少接觸到人，咁非常之唔習慣啦，又空虛又孤獨咁。之後我同自己講唔可以咁落去，要積極咁面對，要反省。因為時間好多，平時可能玩吓手機就過一日，但喺入面，一早就起身望住幅牆，所以有好多時間思考同反省，亦都屋企人入咗啲小說，人生哲學嘅書，同埋聖經，咁我喺入面就係靠佢哋過艱難嘅時候。睇書同聖經嘅時間好似快過咗，同埋吸收咗書本入面嘅哲理，諗嘢多咗。頭幾日真係瞓得唔好嘅，之後雖然都唔係瞓得超級舒服，但都舒服咗。」
「入面唔可以接觸其他人，每日就係多謝入面啲職員，每日送餐畀我嘅時候都同我講一啲鼓勵嘅說話。（佢哋會講啲咩？）大部份都係叫我加油，唔好灰心，好快就過喇，十幾日啫！雖然好簡短咁，因為佢哋都唔可以同我傾偈，但每一次都係好窩心。同埋經歷咗呢段日子，知道同人溝通係好重要。如果一日24小時冇同人傾過偈，係好辛苦。我諗呢個時間係我人生入面最多機會同時間去沉澱自己，過去十幾年都係不斷工作，日接夜夜接日咁拍劇，同埋之前有啲自己嘅生意去處理，30至40歲都冇乜機會去沉澱自己所做嘅嘢。」
至於日前提到楊明因為自身安全的問題而由荔枝角轉去赤柱監獄，他即時否認還露出笑容：「絕對唔係我要求，因為我喺入面係冇得要求，同埋大家唔使擔心，我入到去荔枝角嘅頭5日都係隔離中，因為我都係外來，為咗避免有病毒帶入去，要喺醫院隔離咗我先，絕對係唔存在呢個講法。去到第七日點解我要轉去高度設防嗰個赤柱監獄呢，係因為第七日開始荔枝角嗰度有多人確診，要安全同埋騰返一啲醫療室出嚟，所以要轉我去赤柱嗰邊，係一個好正常嘅做法，因為唔會有其它人同我接觸到，所以完全唔會存在人生安全嘅問題。入面完全唔驚嘅！」
最後楊明亦有談及自己之後的人生路，他表示接來年會選擇先唞唞陪家人，「因為我諗返，我喺呢十幾年真係好少陪屋企人，雖然我每個禮拜都係返屋企食飯，但係真真正正陪佢哋，關心佢哋就冇乜機會。至於工作上面都係睇公司安排。而自己嘅生意亦都係會暫時停一停先，呢十幾日我都冇乜點睇報紙， 我淨係知道聽日（8日）就通關，所有嘢都係要出到嚟再計劃。」楊明亦要計劃如何重新投入社會。
而楊明的家人原來近日確診了肺炎，不過在楊明出獄時已經「陽過」，現時仍在竹篙灣隔離當中，不過仍有少少喉嚨痛，要過兩日才能去接他們及與他們食飯。
【相關文章】：
楊明出獄｜一文重溫入行24年TVB入圍項目 曾演囚犯提名最佳男配角和視帝
楊明出獄｜一文睇清有案底藝人！影壇大亨衰搶劫曾入獄22月 知名歌手曾遭FBI拘捕
