娛樂圈好多所謂的「模範夫妻」表面恩愛，其實一早貌合神離，甚至面臨「離婚」邊緣，「小雲」自細恨做明星，儲心積慮考入銀幕做練習生，可惜生得細粒又成副妹仔格，真係好難出位。但呢個世界，有小姐亦要有丫鬟，小雲畢業後對自己一直做綠葉深心不忿，奈何天賦有限，唔到自己唔認命。不過最好彩係因為工作遇到「吉仔」，而吉仔都唔係咁好彩，出道多年都係做三線配角，演技不是不到家，但就欠咗運氣。遇到小雲之後，知道對方未拍過拖，亦對自己有好感，但自愧事業無成唔敢行多步。小雲平時性格內斂，但唔知點解對住吉仔就主動出擊，女追男隔重紗，好快兩個就拍拖，吉仔亦開始做男主角，而且其中一部劇集有突破，好評如潮。

吉仔覺得小雲真係旺自已，提出一齊同居，小雲以為米已成炊，點知吉仔一直怕畀承諾，拖咗足足幾年，由於小雲想結婚，終於諗到自殘呢招，迫吉仔乖乖就範。有時夾硬得到又未必好，小雲婚後即刻生幾個，吉仔亦盡好老竇責任，非常顧家，掛住搵食，諗住小雲一直係好女人格局，咁恨結婚生埋細路自然埋街食井水安安份份，令自己無後顧之憂。

點知小雲婚後覺得好悶，趁帶細路返學期間走去上興趣班，因為好多同學，令小雲增加社交機會，發覺外面的世界多姿多采。同時遇上一個「讀書人」發力狂追，小雲的感情世界一向dry爆，有人追當自己公主咁招呼，自然春心盪漾，話咁快就對吉仔無晒feel，當然無feel，而小雲決定一搏，單方面入紙申請離婚，殺吉仔一個措手不及，依家正用盡方法，包括畀晒副身家，希望挽回小雲變咗嘅心，如果傾唔掂數，呢對模範夫妻離婚真係會震驚全個娛樂圈。

 

【其他文章】：

萬千星輝頒獎典禮2022丨陳貝兒冧莊獲最佳女主持：我要話畀大家聽我係一個港女

萬千星輝頒獎典禮2022丨曾志偉親領「最佳綜藝節目」獎 錢嘉樂感激獲提拔由龍虎武師變主持

萬千星輝頒獎典禮2022丨郭柏妍入行兩年獲女飛躍 哽咽多謝胡定欣：我會記住帶粉餅

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ